Қазақстанда шетелдік көліктерді заңдастыру 23 қаңтарда басталады. Бұл жұмыстар тиісті талаптар бойынша жүргізіледі. Ішкі істер министрлігінің мәліметінше, біріншіден, көлік 2022 жылдың 1 қыркүйегіне дейін елге әкелінуі керек. Екіншіден, ол іздеуде болмауға тиіс. Үшіншіден, басқа мемлекетте бұрынғы тіркелген жері бойынша есептен шығарылуы қажет. Соңғысы - кедендік тексеруден өтуі керек.
Көліктерді заңдастыру тәртібі қалай жүргізіледі? Бұл сұраққа Әкімшілік полиция комитеті төрағасының міндетін атқарушы Қайсар Сұлтанбаев жауап берді. Оның айтуынша, азаматтар заңдастыру туралы өтінішті egov.kz порталы арқылы немесе арнайы ХҚКО-ларға барып бере алады. Орталықтарда көліктерді тіркеуге ниетті көлік иелерінен ғана құжат қабылдайтын арнайы секторлар ұйымдастырылады.
Арнайы ХҚКО-ларға барған көлік иелерінен 4 құжат талап етіледі. Заңдастыру туралы өтініш, өтініш берушінің жеке басын куәландыратын құжат, көлік құралының паспорты немесе көлік құралын тіркеу туралы куәлік, көлік құралына меншік құқығын растайтын құжат қажет.
Сұлтанбаевтың мәліметінше, өтініш пен құжаттарды тапсырған соң сәйкестендіру нөмірлерін тексеру мақсатында көлік арнайы халыққа қызмет көрсету орталығындағы тексеру пунктіне тапсырылады. Бұл жұмысты ішкі істер органдарының сарапшы-криминалисті жүргізеді.
Тиісті процедуралар аяқталғаннан кейін 2 күн ішінде жауапты орган автокөлікті заңдастыруға болатыны немесе рұқсат етілмейтіні туралы шешім қабылдайды. Яғни, бұл аралықта қызметкерлер көлікті ҰҚК-ның Шекара қызметі, мемлекеттік кірістер органдары және Интерполдың базалары арқылы тексереді.
