Тұрғымбаев: Полиция митингіде ешкімді азаптамады

Ішкі істер министрі Ерлан Тұрғымбаев бүгін өткен онлайн брифингіде кеттлинг бүкіл әлемде қолданылатынын, полицейлердің наразыларды сағаттап құрсауда ұстау әрекетін азаптауға жатқызбайтынын жеткізді.

"Кеттлинг БҰҰ-ның адам құқықтары туралы конвенциясы мен азаматтық және саяси құқықтар жөніндегі халықаралық пактіге қайшы. Адамды тоғыз сағаттан астам аязда ұстап, үйге жібермей, тамақ бермей қоюды азаптау деуге бола ма?" деген Азаттық тілшісінің сұрағына ішкі істер министрі Тұрғымбаев"қоршауға алу әдісі бүкіл әлемде қолданылатынын" жеткізді.

"Сіздің ақпаратыңыз дұрыс емес. Бұл заңсыз митинг болатын. Бізде бейбіт митингілер туралы заң бар. Заңсыз митингілерге қарсы бүкіл әлемде құрсауға алу әдісі қолданылады. Турникеттер, көліктер, су шашатын құралар мен полицияның жеке құрамы құрсауға алуы мүмкін. Бұл бүкіл әлемде қолданылады. Біздің ішкі бұйрықтарымыз бен нұсқауларда "кеттлинг" сөзі қолданылмайды, "адамдар тобы қоғамдық тәртіпті бұзатын жерлерді қоршау" деп аталады", - деді министр.

 Тұрғымбаев полицейлер қоршауда қалған адамдарды азаптамағанын, күштеп қоршауда ұстамағанын жеткізді.

"Заңсыз митингілер өткен жерді қоршағанымыз рас. Бірақ басқа елдің полициясы сияқты су шашпадық, арнайы құралдар, жарық-дыбыс гранатасын қолданбадық. Полицейлер қару, дубинка, газсыз-ақ құқық бұзушылықтың алдын алады. Азаптау болған жоқ, өйткені қоршаудан шығамын дегендерді жібердік, су, тамақ ұсындық, ешкімді күштеп ұстамадық", - деді Тұрғымбаев.

Қазақстан полиция наразылыққа шыққандарға кеттлинг әдісін жиі қолдана бастады. Алматыда полицейлер бейбіт шеруге шыққандарға қарсы бірнеше мәрте кеттлинг әдісін қолданған. Мәжіліс сайлауынан кейін наразылыққа шыққан ондаған белсендіні полиция он сағат бойы қоршап, тамақ пен су бермеді, тіпті дәретханаға шығармады.