Ұшақ, ұшақ, Батькадан әрі кет!

Еуроодақ елдері Беларуське қарсы санкция қабылдамақ. Беларусьтің "Бельавиа" әуе компаниясына Еуроодаққа кіретін 27 елдің әуе кеңестігін пайдалануға тыйым салынбақ. Еуроодақ Еуропаның барлық әуе компанияларын Беларусь арқылы ұшпауға шақырған. Айта кетініні, қазірдің өзінде көптеген әуе тасымалдаушылары Беларусьтің әуе кеңістігімен ұшпай, айналып өтуде.

Сондай-ақ Еуроодақ Беларусьтен журналист Роман Протасевич пен оның қызын дереу босатуды талап етті. Еуроодақ Беларусь шенеуніктері мен ұйымдарына таяуда санкция салмақ.

Ұлыбритания Беларусьтің "Белавиа" ұлттық компаниясына әуе кеңістігін бірден жауып тастап, өз аумағы арқылы ұшырмайтынын, өз аумағындағы әуежайға қондырмайтынын мәлімдеді. Ұлыбританияның көлік министрі Грант Шаппс "Белавианың" Лондондағы Гэтвик әуежайына күнделікті рейстерін тоқтатып тастады. Сонымен қатар британдық әуе компаниялар Беларусьтің әуе кеңістігімен ұшпайтынын айтты. Министрдің айтуынша, Ryanair ұшағын мәжбүрлеп қондыру мен Роман Протасевичтің ұсталуына Ресей арнайы қызметінің қатысы болуы мүмкін.

Ұлыбританияның сыртқы істер министрі Доминик Рааб Беларусь елшіссін шақырып алып сөйлесті. Минск халықаралық құқықты бұзғаны үшін Ұлыбритания Лукашенкоға санкция салатынын жеткізді.

Германияның Lufthansa, Латвияның Air Baltic, Венгрияның Wizz Air, Польшаның LOT, Нидерландының KLM және Швецияның SAS әуе компаниялары дүйсенбі күні-ақ Беларусь аспанымен ұшуды тоқтатты. Ал Литва өз елінің аумағындағы әуежайдан бет алған барлық әуе компаниясының ұшақтарына Беларусь арқылы ұшуға тыйым салды. Оны былай қойғанда, Литва билігі өз азаматтарын Беларуське бармауға, ал сол елде жүрген азаматтарын тезірек кетуге шақырды.

Украина президенті Владимир Зеленский үкіметке Беларусьпен әуе рейстерін тоқтатуды және бұл елдің әуе кеңістігімен ұшақ ұшыруға тыйым салуды тапсырды.

Қызығы, қазақстандық Air Astana әуе компаниясы 31 мамыр күні Минскіге жіберуді жоспарлаған тікелей рейсті кейінге қалдырды. Алайда әуе компаниясының айтуынша, бұған Ryanair ұшағын Минскіге күштеп қондырған оқиғаның қатысы жоқ.

23 мамырда Ryanair әуе компаниясының Грекиядан Литваға ұшып бара жатқан рейсі бағытын өзгертіп, Минскіге қондырылды. Беларусь билігі арнайы әскери ұшақ жіберіп, рейсте бомба болуы мүмкін деп Ryanair ұшағын Минскіге бұрған. Борттан бомба табылмады, ал ұшақта болған NEXTA Live Телеграм каналының құрушылардың бірі Роман Протасевичті Беларусь полициясы тұтқынады.