Қазақстанда маусым айында 167 878 автокөлік мемлекеттік есепке қойылды. Бұл мамыр айымен (147 668 көлік) салыстырғанда 13,7%-ға көп. Бұл туралы Ұлттық статистика бюросы мәлімдеді, деп хабарлайды Malim.kz.
Бюро мәліметінше, тіркелген көліктердің 87,4%-ы жеңіл автомобильдер, 5,7%-ы жүк көліктері, 2,4%-ы тіркемелер, 1%-ы мотоциклдер, 0,9%-ы автобустар, ал 2,6%-ы өзге көлік түрлері.
Маусым айында есепке қойылған көліктердің 34,5%-ының қозғалтқыш көлемі 1500-2000 текше сантиметр аралығында болған.
Жанармай түріне қарай:
- бензинмен жүретін – 136,2 мың көлік;
- дизель отынымен – 10,8 мың;
- газбен – 895;
- аралас отынмен – 11,1 мың;
- электр қуатымен – 2,8 мың көлік тіркелген.
Ал тағы 5,8 мың көліктің жанармай түрі көрсетілмеген.
2026 жылғы 1 шілдедегі жағдай бойынша Қазақстанда 6 миллионнан астам автокөлік тіркелген. Оның ішінде:
- 5,05 миллионы – жеңіл автомобиль;
- 493,7 мыңы – жүк көлігі;
- 89,5 мыңы – автобус;
- 74,2 мыңы – мотоцикл;
- 262,3 мыңы – тіркеме;
- 52,6 мыңы – өзге көлік түрлері.
Ең көп автокөлік Алматы қаласында – 733,3 мың, сондай-ақ Алматы облысында – 646,3 мың бірлік тіркелген.
