Мадина Сәдуақасова офицер боламын деп жүргенде қалай танымал әнші болғанын айтты

Қазақ эстрадасының танымал жұлдызы Мадина Сәдуақасова өнерге қалай келгенін және жұлдызға айналғанын баяндап берді, деп хабарлайды Malim.kz.

Әншінің айтуынша, бастапқыда оның эстрадаға мүлдем қызығушылығы болмаған, керісінше офицер болуды армандаған. Сәдуақасова көпшілік біле бермейтін қызықты оқиғамен бөлісіп, бала кезіндегі арманы күтпеген жерден өнер жолына ауысқанын атап өтті. 

2000 жылы барлығымыз президент оркестрінде жұмыс істедік. Менің өмірімдегі ең керемет кезең. Өйткені мен мүлдем эстрадалық ән айтқан жоқпын. Сол кезде ұлттық аспаптармен әндер орындайтынмын. 2003 жылы Астанаға композитор Ермек Елгезеков келеді. Ол маған Алматыға көшу туралы айтады, деді әнші.

Офицерлік мансап туралы ойлап жүрген кезде, ол кенеттен эстрада сахнасына қадам басқан.

"Мен көшпеймін. Қазір сержантпын, әлі офицер боламын" деп айтамын. Әскери адамдардың арманы сол ғой. Ол кісі қоймай, маған ән жазып беретінін айтты. Жарты сағаттың ішінде сөздерін жазды. Түніме аранжировкасын жасапты. "Ән келді, түнімен өңдедім. Сен келген кезде сөздер де келді. Енді дауысыңды басып бер" деді. Ол "Махаббат жалыны" әні болды. Мен жаздым, ол кісі әнді Алматыға алып кетті. Бұл әннің тұсауы Санкт-Петербург қаласында Шұғыла Сапарғалиқызының кешінде кесілді. Халық өте керемет қабылдады, деді Сәдуақасова "Замандастар" бағдарламасында.