«Ол қол көтеретін жігіт емес»: Say Mo бұрынғы күйеуі Шакентидің видеосынан соң мәлімдеме жасады
Әнші қыз ажырасқанда талай айыптаулар естігенін айтты.
Сүйіктісіне қол көтерді деген айып тағылған актер Шәріп Серіктің әрекеттері туралы оның бұрынғы әйелі, танымал әнші Say Mo да айтып берді, деп хабарлайды Malim.kz.
«Шакентидің» Say Mo-дан кейін қосылған жары Әлия Бутеева актердің лифтіде шабуылдаған видеосын жариялаған еді. Осыдан соң Say Mo да үнсіз қалмады.
Шынымды айтсам, таңғалмаймын. Ол жігіттен бес жыл бұрын талай қорлық көрдім. Әлі күнге дейін терапияда жүрмін. Мен де сол кезде қолымда дәлел болмаған соң тақырыпты қозғауға қорықтым. Себебі оның анасы – адвокат. Одан кейін бәрі мені кінәлады. Тіпті кейбір таныстарым менен теріс айналды. Әлі есімде, Алматыдағы «Вавилон» тұрғын үй кешенінің алдында қол көтерді. Бірақ мен тұрғын үй кешенінің әкімшілігінен бейнежазбаны ала алмадым. Сол түні әрі қарай не болғанын айтып бастасам, қорқынышқа толы әңгіме болады, деп жазды әнші.
Say Mo көпшілік күйеуін емес, өзін айыптағанын алға тартты.
Екеуміз екі жаққа кетіп жатқанда, «ол қол көтеретін жігіт емес, қыздың өзі көзіне шөп салған» деп мені қаралады. Соңында не болғанын бәріміз көрдік. Қыздар, бірдеңені анық түсінуіміз керек: абьюзер адам ешқашан өзінен кінә іздемейді. Өздерін керемет адам деп есептейді. Одан кейін аналары да олар үшін ең керемет жан, деп жазды өнер иесі.
Фото: Instagram/shakentii
