Қайрат Нұртас ұшақ бортында шу шығарып, қамауға алынды, деп хабарлайды Malim.kz.
Бұл туралы әлеуметтік желілерде ақпарат тараған. Артынша Көліктегі полиция департаменті де ресми мәлімдеме жасап, ақпаратты растады.
Дереккөздерге қарағанда, Қайрат Нұртас Алматыдан Астанаға ұшып, бортта жанжал шығарған. Төбелес салдарынан бір жолаушы жеңіл жарақат алған.
Оқиғаға байланысты әуе кемесінің командирі полицияның көмегіне жүгінуге мәжбүр болған. Тәртіп сақшылары екеуін де бөлімшеге жеткізіп, Қайраттың үстінен екі бірдей әкімшілік құқықбұзушылық хаттамасын толтырған. Бірі, денсаулыққа қасақана жеңіл зиян келтіру, екіншісі ұсақ бұзақылық.
Көліктегі полиция департаментінің мәлімдеуінше, «бір жыл ішінде қайталап жасалған ұсақ бұзақылық» (бұрын әншіге сахнада балағат сөздер айтқаны үшін айыппұл салынған) және «денсаулыққа қасақана жеңіл зиян келтіру» баптары бойынша іс қозғалған.
Айта кетейік, бұл бапқа сәйкес, оған айыппұл, қоғамдық жұмыстарға тарту, бас бостандығын шектеу, тіпті 5 жылға дейін бас бостандығынан айыру түріндегі жаза қарастырылған.
Фото: әлеуметтік желіден
MalimBlocks
