Денсаулық сақтау министрлігіне барып, вакцинацияға наразылық танытып, шенеуніктерге қол көтерген көпбалалы аналар жазаланды. Бұл туралы Нұр-Сұлтан қаласының полиция департаменті хабарлады.

"Заңға қайшы әрекеттері мен бұзақылық үшін 6 әйел әкімшілік жауапкершілікке тартылып, әрқайсысына 25 айлық есептік көрсеткіш (әрқайсысына 72 925 теңге) көлемінде айыппұл салынды", - делінген хабарламада.

Оқиға 19 шілде күні болған.

Нұр-Сұлтан қаласы полиция департаменті таратқан хабарламада сол күні "бір топ ашулы әйел өткізу ережелеріне қайшы министрліктер үйіне баса-көктеп кірмек болды, полиция қызметкерлеріне тіл тигізіп, оларды соққылап, күзетшілер мен денсаулық сақтау министрлігі қызметкерлеріне су шашқаны" айтылады.

"Денсаулық сақтау министрлігінің жауапты қызметкерлері диалог құруға, мәселелерді түсінуге және олардың шешімін табуға тырысқанда, әйелдер оларға балағат сөз айтып, беттерінен соғып жіберген, киімдерін тартып жұлқылаған", - делінген хабарламада.

19 шілде күні вакцинаға қарсы бір топ әйел астанада наразылық шарасын өткізіп, соңыра денсаулық сақтау министрлігіне барып, вакцинацияға қарсы екенін білдірген. Наразылардың алдына шыққан денаулық сақтау министрінің орынбасарлары Жандос Бүркітбаев, Ажар Ғиният пен бас санитар дәрігердің ресми өкілі Ержан Байтанаев оларды ішке кіріп, сөйлесуге шақырған. Алайда әйелдер оларға құрақ аспай, 12 жастан асқан балаларға вакцина салмауды талап етіп, шу шығарған. Шенеуніктер наразылармен сөйлесіп, диалог орнатуға тырысқанымен, олардың әрекетінен түк шықпады.

 Әлеуметтік желіде таралған видеода ресми өкіл Ержан Байтанаевтың наразыларға Қазақстанда 12 жастан асқан балаларға коронавирусқа қарсы екпе салынбайтынын айтып түсіндірмек болғаны, бірақ әйелдердің оны бас салып,  ұрып-соғып, балағат сөздер айтқаны байқалады (Денсаулық сақтау министрлігі денсаулық сақтау министрлігі санитарлық-эпидемиологиялық комитетінің төрағасы Айжан Есмағамбетова 16 шілде күні министрлік 12 жастан балаларға ата-анасы немесе ресми қамқоршылардың рұқсатымен Pfizer вакцинасын салу мүмкіндігін қарастырып жатқанын, алдын ала келісім бойынша, бұл вакцина 2021 жылдың 4-тоқсанында келуі керектігін мәлімдеген).

 Тағы бір видеода әйелдердің денсаулық сақтау министрінің орынбасары Жандос Бүркітбаевқа қол көтергені байқалады.

Бас санитар дәрігердің ресми өкілі Ержан Байтанаев Facebook-тегі парақшасында бұл оқиғаны "арсыздық және агрессия" деп сипаттап, шабуыл кезінде министрліктің қоғамдық қабылдау бөліміндегі мүмкіндігі шектеулі әйел қызметкердің зарап шеккенін жазған. Байтанаевтың айтуынша, әйелдер мүмкіндігі шектеулі әйел қызметкерге күш қолданып, қорлаған.

Оқи отырыңыз:  Цой министрлікке келген әйелдердің алдына неге шықпағанын түсіндірді