Мектептегі былықты жасыру үшін 26 млн теңге пара берген
Сарыағаш ауданындағы мектептердің бірінде аудиторлық тексерістің оң қорытындысы үшін 26 млн теңге көлемінде пара берген,- деп хабарлады Сыбайлас жемқорлыққа қарсы іс-қимыл агенттігінің баспасөз қызметі.
Сыбайлас жемқорлыққа қарсы қызмет білім беру саласындағы жемқорлық пен сыбайластықты тергеуді жалғастыруда. Білім беру саласындағы былықты мемлекеттік аудиторлар жасыруға көмектескен. Мұндай жағдай бірнеше облыста тіркеліп отыр. Түркістан облысында мемлекеттік ревизор – облыстық Тексеру комиссиясының бас инспекторы парақорлықпен әшкереленді. Ол Сарыағаш ауданындағы мектептердің бірінде аудиторлық тексерістің оң қорытындысы үшін 26 млн теңге көлемінде пара алды деп күдіктелуде. Күдікті ұсталып, уақытша ұстау изоляторына қамалған. Жетісу облысында да бюджет қаражаты «өлі жандардың» шоттарына ақша аудару және мектеп қызметкерлерінің жалақысын асыра есептеп, кейіннен оларды қолма-қол ақшаға айналдыру арқылы ұрланған.
Талдықорған қаласындағы мектептердің бірінде аудиторлық тексерістің оң қорытындысы үшін мемлекеттік аудитор 500 мың теңге көлемінде пара алғаны әшкереленген. Қазіргі уақытта аудитор сотқа тартылған.
Қылмыстық іс Алматы облысында да тіркелген. Онда облыстық тексеру комиссиясы бөлімінің басшысы Қарасай ауданының білім бөлімінің бухгалтерінен аудиторлық тексерудің оң нәтижелері үшін 1 млн теңге сомасында пара алған. Бұл факті бойынша Алматы облысының Сыбайлас жемқорлыққа қарсы қызметі сотқа дейінгі тергеу жүргізіп жатыр.
Қылмыстық-процестік кодексінің 201-бабына сәйкес өзге де ақпарат жария етуге жатпайды.
