Назарбаев университетінің мәртебесі өзгертілмейді
Ғылым және жоғары білім министрі Саясат Нұрбек Назарбаев Университетінің мәртебесі өзгермейтінін мәлімдеді. Ол “заңды алып тастап, өзгерте алмаймыз” деп отыр.
-Назарбаев Университетінің мәртебесі заңмен реттелген. Назарбаев зияткерлік мектептерінің де. Сол себепті бұл заңды алып тастап, өзгерте алмаймыз. Бірден айтайын, біздің міндет – осы университеттің әлеуетін сақтау. Бұл толыққанды зерттеу университеттерінің бірі. Қазіргі уақытта аталған университетке қатысты өте көп спекуляция жүріп жатыр. Шынымды айтайын, ел ішінде оқу ақысы жайлы тараған ақпарат шындыққа сәйкес келмейді. Бұл өте мықты зерттеу университеті. Сол себепті мәртебе жағынан ештеңе өзгермейді, - деді Саясат Нұрбек үкіметтің баспасөз орталығында.
Министр қазіргі уақытта заңға тиісті өзгерістер енгізілді дейді. Бірақ нақты қандай өзгерістер екенін ашып айтпады. Саясат Нұрбек оқу орнының қаржылық және зерттеу әлеуетін арттыру бағытында жұмыс жүргізіліп жатқанын жеткізді.
-Оның керемет базасы, инфрақұрылымы бар. Түзету жұмыстары әлбетте, болады. Бірақ университеттің мәртебесін немесе бағытын өзгертуді жоспарлап отырған жоқпыз, - деді Саясат Нұрбек.
MalimBlocks
