Тұңғыш Президент күні қарасайлықтар керемет тартуға ие болды. Қаскелендік жиырма жеті отбасы баспаналы болды. «Қарлығаш» шағынауданындағы пәтерлер бірінші кезекте көпбалалы отбасыларға, жалғыз басты аналарға, ата-анасыз қалған жетім балалар мен мемлекеттік қызметкерлерге берілді. Бұл туралы МӘЛІМ КЗ сайты хабарлайды.
Су жаңа пәтерлер «Шаңырақ» және «7-20-25» бағдарламасы бойынша берілді. Айта кету керек, «Шаңырақ» бағдарламасы мемлекет басшысы Қасым-Жомарт ТОҚАЕВТЫҢ бастамасымен іске қосылған. 1986 жылдан бері пәтер кезегінде тұрған адамдар қатыса алады. Және үйдің құнының он пайызын төлеу шарт. Жылына бес пайыздық мөлшермен үй жиырма жылға беріледі. Уақыт өте жылдық пайыз мөлшері азаяды. Мерекеге орай баспаналы болған мемлекеттік қызметкер Гүлмира ЕМБЕРДИЕВА он жыл баспана кезегінде тұрған. Бүгін көңілі шат, қуанышында шек жоқ.
«Тұңғыш Президент күніне орай бізге пәтер кілті беріліп жатыр. Барша баспаналы болып жатқан жандарды шын жүректен құттықтаймын! Маған жалғыз басты ана және мемлекеттік қызметкер ретінде 2 бөлмелі пәтерді берді. Елімізде осындай жақсылықтар көп болсын. Қарасай аудандық әкімдігіне алғыс білдіремін», - деді «азаматтарға арналған үкімет» мк маманы Гүлмира Ембердиева.
Тағы да баспаналы болғандардың арасында Айнұр ИСЛАМОВА есімді қарасайлық тұрғын бар.
«Айтуға тілің жетпейтін қуаныш болады. Бүгін сондай күйді бастан кешіріп отырмыз. Жергілікті билік өкілдері, мынандай бағдарламаға рақмет айтқымыз келеді. Әр отбасы өз баспанасында тұрғысы келеді ғой. Елімізде қоныс тойлар көбейе берсе екен», - деді Айнұр Исламова.
Қарасай ауданында қоныс тойлар өз жалғасын таба бермек. Қазір Қаскелен қаласындағы «Өмірзақ» шағынауданында 130 пәтерлі тұрғын үй құрылысы жүріп жатыр екен. Аяқталысымен 500-ден аса аудан азаматы баспаналы болады.
«Бүгін аудан жұртшылығына беріліп жатқан тұрғын үй мемлекеттік бағдарламамен салынған. Оған бюджеттен 360 миллион теңге бөлінді. Бұның салынуына облыс басшысы Амандық Баталовтың үлкен көмегі болды. Үй кезегінде тұрғандар бүгін баспанаға қол жеткізді. Алдағы уақытта «Қарлығаш» ықшамауданында елу пәтерлік тұрғын үйдің кілтін табыстаймыз», - деді қуанышты шарада сөз алған Қарасай ауданы әкімі Жандарбек ДАЛАБАЕВ.
