Қостанайда екі бөлмелі үйде есірткі өсіретін зертхана анықталды

Қостанайда полицейлер қарасора өсіретін фитозертхананы анықтады,  деп хабарлайды Polisia.kz. Ақпаратқа сәйкес, жергілікті тұрғын зертхананы екі бөлмелі пәтерде ұйымдастырған. 

Тінту кезінде полицейлер жалпы салмағы 12,5 келі болатын қарасора бұталарын тәркіледі. Мұнда арнайы жабдықтар да болған: жарық және диодты шамдар, термометрлер, желдеткіштер, ылғалдылықты өлшеу құралдары.

Қостанай облысы ПД есірткі қылмысына қарсы іс-қимыл басқармасының қызметкерлері екі ер адамды ұстады.

«Фитозертхана құрамында есірткі заттары бар қарасора өсіруге арналған. Осы дерек бойынша қылмыстық іс қозғалып, тергеу жүргізіліп жатыр,» – деп атап өтті басқарма бастығы Нұржан Ахметов.

Ұсталғандардың өзге де қылмысқа қатысы бар-жоғы тексеріледі. Қарасора өсіргені үшін үш жылдан сегіз жылға дейінгі мерзімге бас бостандығынан айыру түріндегі ең жоғары қылмыстық жаза қарастырылған.