«Шал кет» деп айғайлағаны үшін 9 ай жаза
Әділет Мусин жазасын қауіпсіздігі орташа мекемеде өтейді. 38 жастағы Әділет Мусин бұған дейін өзіне тағылған айыптарды үзілді-кесілді жоққа шығарған. Прокуратураның айтуынша, 2022 жылы 4 қаңтарда Мусин жұртты «билік өкілдерінің заңды талаптарына бағынбауға шақырған». Ал қорғау тарабы соңғы сот отырыстарында «оны Қаңтар кезінде «Шал, кет!» деп айғайлағаны үшін ғана соттағысы келеді, ал мұны Қаңтар кезінде бүкіл елдің жартысы айтқан» деп мәлімдеген еді. Олар Мусиннің кінәсін дәлелдейтін айғақтар жоғын, сотта сөйлеген куәгерлердің ешқайсысы Мусиннің «заңсыз әрекетке барғанын» айтпағанын алға тартқан.
27 шілде күні сот үкімінен кейін Мусинді қарауыл сот залынан алып кетті,- деп жазды Азаттық сайты.
Туыстарының айтуынша, Әділет Мусин тергеу изоляторында отырған кезде азаптауға ұшыраған. Былтыр қыркүйекте анасы Бақыт Ысқақова мекеме қызметкерлерінің ұлын «ұрып-соққанын» айтқан. Алайда азаптау туралы шағым сол күйі қаралмаған. Медициналық сараптама Әділет Мусиннің мойнының алдыңғы жағы жырылғанын, сол жақ беті, оң жақ шынтағы мен оң жақ иығы, екі тобығы көгергенін анықтаған.
Қаңтар оқиғасында ресми есеп бойынша 238 адам қаза тапқан. Алтауы түрмедегі азаптау кезінде көз жұмған.
Самое читаемое
