Президентпен кездесуге келген спортшылардан коронавирус анықталды
Бұл туралы президенттің кеңесшісі әрі баспасөз хатшысы Берік Уәли айтты
Бүгін, 15 тамызда, Қасым-Жомарт Тоқаев Париж Олимпиадасының жеңімпаздарымен және жүлдегерлерімен кездеседі деп жоспарланған болатын. Берік Уәлидің айтуынша, спортшылардың жартысына жуығынан коронавирус анықталуына байланысты іс-шара кейінге шегерілді, деп хабарлайды Malim.kz.
Өздеріңізге белгілі, президент Қасым-Жомарт Кемелұлы спортшылармен кездеседі деп жоспарланған болатын. Өкінішке қарай, спортшылар мен бапкерлердің жартысына COVID-19 диагнозы қойылды, сондықтан кездесуді кейінге қалдыруға тура келді. Барлығына тезірек сауығып кетуін тілейміз, - деді Берік Уәли.
Баспасөз хатшысының сөзінше, кездесу тамыз айының соңында Ақордада жоспарланған.
Айта кетейік, Париждегі төртжылдықтың бас додасында Қазақстан құрамасы 7 медальмен жалпы есепте 43-орынға тұрақтады. Спортшыларымыз бір алтын, үш күміс және үш қола медаль еншіледі.
Фото: Ақорда
