Қазақстанның таеквондошылары Иорданияның Амман қаласында өткен лицензиялық Азия чемпионатында Олимпиада ойындарының екі жолдамасын жеңіп алды.
Иордания астанасында өткен турнирде Қазақстаннан төрт спортшы қатысқан еді. Өкінішке қарай, жарыстың алғашқы күні бақ сынаған Фариза Алдонғарова (49 келі) мен Қайрат Сарымсақов (68 келі) жартылай финалда сүрініп, Токио олимпиадасынан тыс қалды. Есесіне, жарыстың екінші күні спортшыларымыз бірден екі жолдама алды. Атап айтсақ, жартылай финалдық жекпе-жектерін сәтті өткізген Жансель Дениз (+67 келі) бен Руслан Жапаров (+80 келі) Олимпиадаға баратын спортшыларың қатарына қосылды. Турнир қорытындысы бойынша Тайпей таеквондошылары мүмкін болған төрт жолдаманың барлығын иеленді. Өзбекстан үш жолдама алды. Жарыс қожайындары Иордания мен Қазақстанда екі жолдамадан бар. Таиланд, Филиппин, Қытай, Вьетнам және Иран елдерінде бір-бір жолдамадан.
Олимпиада ойындарына тура екі ай қалды. Қазақстандық спортшыларда әзірге 59 жолдама бар.
Бокс (ерлер) – 8 жолдама; Байдарка және канода есу – 6; Еркін күрес – 5; Садақ ату – 4; Велошоссе – 4; Жеңіл атлетика – 3; Велотрек – 3; Грек-рим күресі – 3; Әйелдер күресі – 3; Жүзу – 2; Қазіргі бессайыс – 2; Таеквондо – 2; Слаломда есу – 2; Академиялық есу – 1; Каратэ – 1; Семсерлесу – 1; Үстел теннисі – 1; Су добы – 1; Бокс (әйелдер) – 1; Стенд ату – 1; Нысана көздеу – 1; Спорттық гимнастика – 1; Спорттық өрмелеу – 1; Үйлесімді жүзу – 1; Ашық суда жүзу – 1;
