Жанқош Тұраров IBO чемпиондық белбеуінен айрылатын болды
Жекпе-жекке ұзақ уақыт шықпай кетуі себеп болып отыр
Қазақстандық боксшы Жанқош Тұраров (28-0, 20 КО) жартылай орта салмақта IBO нұсқасы бойынша чемпиондық белбеуінен айрылады, деп хабарлайды Malim.kz Vesti.kz сайтына сілтеме жасап.
Сайт жазуынша, бұл шешім спортшының белсенділігінің төмендігіне байланысты қабылданады. IBO ережелеріне сәйкес, чемпиондық титулды қорғау кемінде жылына бір рет өтуі тиіс. Алайда, 10 желтоқсан күні Жанқоштың соңғы жекпе-жегіне бір жыл толады. Бұл оның чемпион атағынан айрылуына негіз болды.
Жанқош Тұраров өз белбеуін 2023 жылдың наурызында мексикалық Алехандро Менесесті (17-6, 10 КО) 10-раундта жекпе-жектен бас тартуға мәжбүрлеп, жеңіп алған. Кейін ол белбеуін сол жылдың желтоқсанында жапон Акихиро Кондоны (37-12-2, 21 КО) жеңіп, сәтті қорғады.
Алайда, келесі қорғау жекпе-жегі, яғни 28 қыркүйекте Алматыда жеңіліс көрмеген венесуэлалық Хесус Корреа Пинтоға (16-0, 16 КО) қарсы өтуі тиіс кездесу, белгісіз себептермен тоқтатылды.
Дәл осындай жағдай қазақстандық тағы бір боксшы, Данияр Елеусіновте де (12-0, 7 КО) болған еді. Ол 2021 жылдың желтоқсан айында IBO чемпиондық белбеуін жеңіп алғанымен, бір жыл ішінде белбеуін қорғамағаны үшін атағынан айырылған.
Фото: instagram/zhankoshturarov
MalimBlocks
