Солтүстік Қазақстан облысында ірі жол-көлік оқиғасында зардап шеккендердің жағдайы белгілі болды.
1 қыркүйек күні «Челябі-Новосібір» республикалық маңызы бар автожолда жол-көлік оқиғасы болып, екі адам мерт болды. Бесеуі түрлі дене жарақатымен емдеу мекемелеріне жеткізілді.
СҚО Денсаулық сақтау басқармасының мәліметінше, зардап шегушілердің ең егде жастағысы - 74-те, ең жасы жиырмадан асқан.
Біреуі жол-көлік апатынан кейін Мамлют аудандық ауруханасына жатқызылды. Жағдайы орташа, бүгін пациентті Петропавлдағы көпбейінді қалалық ауруханаға жеткізу жоспарланған. Қалған төртеуі бірден осы қалалық көпбейінді ауруханаға жеткізілді. Екеуі ер адам, екеуі – әйел. Бүгінгі таңда 52 жастағы ер адам мен зейнеткер әйелдің жағдайы өте ауыр, тұрақсыз, түрлі сынық алған, жансақтау бөліміне жатыр. Қалғандары травматология бөлімшесінде, олардың да жағдайы ауыр деп бағаланған, - дейді басқарманың баспасөз хатшысы Гүлнар Қалиева.
Естеріңізге салайық, жол-көлік оқиғасы кеше түскі сағат 13.30 шамасында Петропавл-Мамлютка бағытында болды.
Фото: Canva
