Бізді бұл жолы Шымкент шаһары шаруашылығын ұйымдастыру барысы қызықтырды. Әсіресе, маусым айындағы экология және агроөнеркәсіп саласындағы жұмыстар. Бұл бағыт бір ғана тазалық акциясымен шектелмейтіні қуантады. Байқап жүрміз, аталған саланың кешенді бастамалары табиғи ресурстарды басқару, санитарлық қауіпсіздік, ауыл шаруашылығының тұрақтылығы және энергия тиімділігі сияқты бірнеше бағытты қамтып келеді. Бұдан мегаполистің «жасыл» күн тәртібінің жүйелі сипат алып келе жатқанын анық аңғаруға болады. Мәселен...
Биыл зиянкестер мен кеміргіштерге қарсы іс-шаралар ерекше назар аудартты. Шымкент қаласының ауыл шаруашылығы және ветеринария басқармасының хабарлауынша, осы бағыттағы жұмыстар жүйелі жүргізіліп жатыр. Соның арқасында ауыл шаруашылығы, санитарлық қауіпсіздік жайы жіті қадағалауда. Бұған дейін қалада өзен-арналар мен қоқыс жәшіктері маңын залалсыздандыру жұмыстары жоспарланғаны да мәлім: кеміргіштерге қарсы 2,011 млн шаршы метр өзен-арық аумағын және 16 168 шаршы метр қоқыс жәшіктері орналасқан аумақты өңдеу көзделген еді. Бұл шаралардың нәтижесі экологиялық ахуалмен қатар, қоғамдық денсаулық пен ветеринариялық қауіпсіздікке де қатысты екені түсінікті.
Су ресурстары да – күн тәртібінің маңызды бөлігі. Бұл туралы Шымкент әкімдігінің заңнамалық актілерді іске асыру жөніндегі есебінен де қанықтық. Әсіресе, жаңа Су кодексін пайдалануға байланысты жергілікті деңгейде бірқатар міндет көрсетілген. Соның ішінде су қорғау аймақтары мен белдеулерін белгілеу, сумен жабдықтау және су бұру жүйелеріне қатысты реттеу мәселелері қисынды қамтылған. Бұл су тапшылығы мен климаттық тәуекелдер күшейіп отырған жағдайда ресурсты тек жеткізу емес, оны қорғау мен тиімді пайдалануды да алдыңғы қатарға шығарады.
Агроөнеркәсіп саласында да өсім байқалды. Қала әкімдігінің қаңтар-маусым қорытындысы бойынша ауыл шаруашылығының жалпы өнім көлемі 29,1 млрд теңгеге жетті. Яғни, өткен жылдың сәйкес кезеңімен салыстырғанда, көрсеткіш 3 пайызға өскен деген сөз. Демек, агросектор Шымкент экономикасының шағын ғана бөлігі емес. Керісінше, азық-түлік қауіпсіздігі мен қаланың тұрақты дамуы үшін маңызды бағыт болып отыр.
Энергетика мәселесі де осы экологиялық күн тәртібімен сабақтас. Маусым айында еліміз бойынша энергия тиімділігі, жаңартылатын қуат көздерін дамыту, газдандыру және бейбіт атом энергетикасы бойынша мемлекеттік саясаттың жаңа кезеңі айқындала түсті. Атап айтқанда, 16 маусымда Қазақстан мен Қытай азаматтық ядролық энергетика саласындағы ынтымақтастықты кеңейту мәселесін талқылады. Ал газдандыру бойынша 2026 жылы қосымша 32 мыңға жуық азаматты табиғи газбен қамтамасыз ету жоспарланған.
Осы тұрғыдан алғанда, Шымкенттегі «Таза Қазақстан» бастамасын тек көше тазалығымен өлшеу орынсыз болады. Оның мазмұны табиғи ресурстарды қорғау, су мен жерді ұтымды пайдалану, агроөндірістің тұрақтылығы және энергияны тиімді тұтыну мәдениетімен толықтырыла түсуде. Маусымдағы жұмыстардың басты мәні де осында деп білеміз.
