Алматы облысының Талғар ауданына қарасты Нұра ауылында орналасқан №12 мектепте мұғалімнің оқушыға күш көрсеткені туралы ақпарат қоғамда үлкен резонанс тудырды, деп хабарлайды Malim.kz.
8 жастағы баланың анасының айтуынша, оның ұлы ұзақ уақыт бойы мектеп мұғалімінен физикалық әрі психологиялық қысым көрген. Әйел педагогтың әрекеті ақылы қосымша сабақтарға қатысты болғанын және мұғалімнің өзге оқушыларға да қол көтергенін мойындағанын мәлімдеді.
Анасының сөзінше, ол бірнеше рет құқық қорғау органдарына шағым түсірген. Алайда учаскелік полиция қызметкері толыққанды тергеу жүргізбеген, дәлелдер іс материалдарына тіркелмеген және отбасына арыздан бас тарту жөнінде қысым көрсетілген.
Алматы облысының прокуратурасы бұл іске қатысты қылмыстық іс процестік негіздерге байланысты тоқтатылғанын хабарлады. Сонымен қатар, аталған оқиғадан кейін мұғалім 2025 жылдың ақпан айында жұмыстан босатылған.
Отбасының адвокаты бұл шешіммен келіспейтінін айтып, істі қайта қарау, қосымша сараптама тағайындау және қажет болған жағдайда сот арқылы тергеуді қайта жандандыруды талап ететінін жеткізді.
Аталған жағдай Қазақстандағы бала құқығын қорғау, педагогтардың жауапкершілігі және құқық қорғау органдары жұмысының тиімділігі мәселесін қайта көтеріп отыр.
