Еліміздің сыртқы істер министрлігі Дубайда 22 жастағы қазақстандықтың өмір бойына бас бостандығынан айырылғанын хабарлаған еді. Осыған байланысты сотталған жігіттің туыстары мәлімдеме жасады, деп хабарлайды Malim.kz «Ақ Жайыққа» сілтеме жасап.
Басылымның хабарлауынша, бас бостандығынан айырумен қатар, қазақстандық Ернұр А.-ға 2,5 миллион дирхамнан астам айыппұл төлеу міндеттелген. Бұл 300 миллион теңгеден асады.
Туыстарының айтуынша, ол 2024 жылдың қыркүйегінде БАӘ-ге жұмыс істеуге кеткен және жүргізуші болып еңбек еткен. Анасы ұлының кінәлі екеніне сенбейді және оның жала жабудың құрбаны болуы мүмкін екенін айтады.
Сондай-ақ отбасы ұзақ уақыт бойы тағылған айыптардың мәні туралы толық ақпарат алмағандарын жеткізді. Туыстары сот үкімі туралы тек 2026 жылдың сәуір айында білген. Әңгіме 18 наурызда шығарылған бірінші инстанция сотының шешімі туралы болып отыр. Қазақстанның Сыртқы істер министрлігі бұл ақпаратты растады және үкімнің әлі заңды күшіне енбегенін атап өтті.
Айта кетейік, сот шешіміне апелляция берілген, оны қарау 27 сәуірге белгіленген. Сонымен қатар, материалда кейбір БАҚ бұл істі Дубайдағы виллаға жасалған шабуылмен байланыстыратыны айтылған. Ол жерде Эдвард Сабиров тұрған. Оқиға 2025 жылдың жаңа жыл түнінде болған.
Бұған дейін Сыртқы істер министрлігі БАӘ-нің құзырлы органдарына ресми сұрау жолдағанын және жауап күтіп отырғанын мәлімдеді. Бұл жағдай министрліктің ерекше бақылауына алынған.
