Еңбек министрлігінде зейнетақы жинақтарын мерзімінен бұрын алу үшін жеткіліктілік шектерін көтеру ұсынылды, деп хабарлайды Malim.kz zakonkz-ке сілтеме жасап.
Еңбек және халықты әлеуметтік қорғау министрі Асқарбек Ертаевтың айтуынша, алынған қаражатты талдау нәтижесінде шамамен 5 трлн теңгенің 1 трлн теңгеге жуығын 20–35 жас аралығындағы жастар шешіп алғаны анықталған. Ведомство мұндай қаржы жүйеде қалып, болашақ зейнетақыға жұмыс істеуі тиіс, ал мүмкіндік туған сәтте бірден алынбауы керек деп есептейді.
«Еңбек және халықты әлеуметтік қорғау министрлігі ең төменгі жеткіліктілік шектерін көтеруді қажет деп санайды. Бұл жинақтаушы зейнетақы жүйесін дамыту үшін жасалып отыр», – деді Ертаев.
Оның сөзінше, сәуір айында билік жаңа есептеу формуласын қарастыруды жоспарлап отыр: шекті мөлшерді жыл сайын жинақ сомасының шамамен 10%-ына өсіру көзделуде.
Министрлік сондай-ақ қазір шамамен 2,9 млн еңбекке қабілетті қазақстандық мүлде зейнетақы жарнасын аудармайтынын еске салды. Бұл болашақта олардың тек ең төменгі базалық зейнетақымен қалуы мүмкін екенін білдіреді.
