2026 жылғы сәуірден бастап Қазақстанда бірқатар өзгерістер күшіне енеді — мемлекеттік қызметтерді цифрландырудан бастап, мемлекеттік қызметке іріктеу тәртібіне, мобильді аударымдарға қатысты жаңа талаптарға және көлік қатынасына дейін өзгереді. Бұл туралы Malim.kz Orda.kz-ке сілтеп хабарлайды.
Банктер мобильді аударымдар туралы алғашқы деректерді салық органдарына береді
Қазақстандықтардың мобильді аударымдары бойынша банктердің бірінші тоқсан қорытындысындағы алғашқы мәліметтері 2026 жылғы 15 сәуірге дейін салық органдарына жолданады.
Салық бақылауына барлық аударымдар емес, тек үш шарт қатар орындалған жағдайда ғана ілінеді: жеке тұлға 100 және одан да көп әртүрлі адамнан аударым алса, бұл түсімдер қатарынан үш ай бойы түссе және олардың жалпы сомасы осы кезеңде ең төменгі жалақының 12 еселенген мөлшерінен — 1 020 000 теңгеден асса.
Осы критерийлер толық сәйкес келген жағдайда ғана адам салық органдары назарында болады. Мемлекеттік кірістер комитеті мұның өзі есепшоттардың бұғатталуын білдірмейтінін атап өтті. Шектеулер тек камералдық бақылау нәтижесі бойынша жіберілген хабарлама орындалмаған жағдайда ғана қолданылуы мүмкін. Егер аударымдар жеке сипатта болса, азамат оны дәлелдей алады.
Жанармай мен коммуналдық тарифтердің өсуіне мораторий аяқталады
2026 жылғы 1 сәуірден бастап Қазақстанда АИ-92 бензині, дизель отыны және коммуналдық тарифтердің өсуіне қойылған мораторий аяқталады. Ол 2025 жылдың қазанынан бастап енгізіліп, бірінші тоқсанның соңына дейін әрекет етті.
Үкіметте 2026 жылдың екінші тоқсанынан бастап коммуналдық тарифтердің өзгеруі теңгерімді болады деп күтілуде.
Мемлекеттік қызметке іріктеу тәртібі өзгереді
1 сәуірден бастап әкімшілік мемлекеттік лауазымдарға конкурс толықтай eqyzmet порталы арқылы цифрлық форматқа көшіріледі. Іріктеу мерзімі 5–7 жұмыс күніне дейін қысқарып, кезеңдер саны азаяды.
Келесі кезеңге ең жоғары балл жинаған бес кандидат өтеді. Басшылық лауазымдарға — эссе мен сұхбат, ал орындаушы қызметтерге — практикалық тапсырмалар мен психометриялық тестілеу (IQ, EQ, SQ) енгізіледі. Сонымен қатар жеке қасиеттерді бағалау конкурс шеңберінен тыс жүргізіледі.
Мерзімі өткен жүргізуші куәлігін онлайн ауыстыруға болады
2026 жылғы сәуірден бастап қазақстандықтар жүргізуші куәлігін eGov.kz порталы мен eGov Mobile қосымшасы арқылы мерзімі өтіп кеткен жағдайда да ауыстыра алады.
Бұған дейін онлайн қызмет тек жарамды куәлік болғанда немесе жоғалған, ұрланған жағдайда ғана қолжетімді еді. Мерзімі өткен куәлікті ауыстыру үшін міндетті түрде медициналық тексерістен өту қажет. Мәліметтер өтініш беру кезінде мемлекеттік жүйелерден автоматты түрде жүктеледі.
Ал мерзімінен бұрын ауыстырғанда медтексеру қажет емес. Қызмет көрсету уақыты — 60 минут. Цифрландыру министрлігі сәуірден бастап өтінімдерді онлайн беру басым болатынын атап өтті. Болашақта бұл қызмет толық цифрлық форматқа көшіріледі.
Қару айналымына қойылатын талаптар күшейеді
2026 жылғы сәуірден бастап қару айналымы мен күзет қызметіне қатысты заңнамаға өзгерістер күшіне енеді.
Азаматтық және қызметтік ойық ұңғылы қару иелері бақылау үшін міндетті атыс жүргізуге тиіс болады. Мерзімі бұзылса, ІІМ рұқсатты тоқтата алады. Заңды тұлғалар қызметін тоқтатқан жағдайда қару мен оқ-дәріні ішкі істер органдарына сақтауға тапсыруға міндетті. Жеке күзет ұйымдарына қойылатын талаптар да күшейтіледі.
Азық-түлікке ең төменгі баға енгізіледі
2026 жылғы 1 сәуірден 30 маусымға дейін Қазақстанда бірқатар тауарларға ең төменгі баға белгіленеді.
Олардың ішінде:
сүзбе — 1 822 теңгеден;
балқытылған ірімшік — 2 985 теңгеден;
жұмыртқа — 41 теңгеден;
картоп — 90 теңгеден;
қырыққабат — 72 теңгеден;
сәбіз — 106 теңгеден;
алма — 175 теңгеден;
ұн — 175 теңгеден;
күнбағыс майы — 451 теңгеден;
макарон — 248 теңгеден.
Бағалар тоқсан сайын қайта қаралады
Сыра өнімдерін таңбалаудың жаңа ережелері енгізіледі. 2026 жылғы 25 сәуірден бастап сыра және сыра сусындарын таңбалау мен қадағалаудың жаңа тәртібі енгізіледі.
Өндірушілер мен импорттаушылар өнім айналымға шыққанға дейін сәйкестендіру құралдарын енгізуге міндетті болады.
Жүйеге өнім, өндіруші және сипаттамалар туралы мәліметтер енгізіледі. Таңбаланбаған өнімді бір жыл ішінде сатуға рұқсат беріледі.
Астана әуежайында рейстер кестесі өзгереді
2026 жылғы 15 сәуірден 31 мамырға дейін ұшу-қону жолағын жөндеуге байланысты рейстер кестесі уақытша өзгереді. Жолақ күн сайын 10:00-ден 18:00-ге дейін жабылады.
Өзгерістер ішкі және халықаралық рейстерге әсер етеді.
Астана – Талдықорған бағыты бойынша тікелей теміржол қатынасы іске қосылады
2026 жылғы 9 сәуірден бастап «Астана — Ақтоғай — Талдықорған» бағыты бойынша тікелей вагондар жүре бастайды.
№122/121 пойызы құрамына екі вагон қосылады. Ақтоғайға жеткен соң олар Талдықорғанға қарай жалғасады. Пойыздар күн ара қатынайды.
