Алдағы күндері Қазақстан аумағында ауа райы құбылмалы сипатта болады, деп хабарлайды Malim.kz.
Синоптиктердің болжамынша, елдің басым бөлігінде жаңбыр жауып, найзағай ойнайды.
Оңтүстік-шығыстың таулы аймақтарында түнгі уақытта жаңбыр аралас қар жаууы мүмкін. Кей жерлерде бұршақ түсіп, екпінді жел соғады. Сонымен қатар түнгі және таңғы мезгілде тұман күтіледі.
Жауын-шашынсыз ашық ауа райы солтүстік және орталық өңірлерде барлық кезең бойы сақталса, оңтүстікте 28-29 сәуірде, ал шығыста 29-30 сәуірде күн ашық болады.
Республиканың оңтүстік және оңтүстік-батыс аймақтарында шаңды дауыл болуы ықтимал.
Синоптиктер сондай-ақ кей өңірлерде үсік жүру қаупі бар екенін ескертеді. Атап айтқанда, батыс, солтүстік-батыс, солтүстік және шығыс облыстарда, сондай-ақ 28-29 сәуірде орталық өңірлерде түнгі уақытта ауа температурасы 3 градусқа дейін төмендеуі мүмкін.
Соған қарамастан, күндізгі уақытта ауа температурасы біртіндеп көтеріледі. Елдің оңтүстігінде +34 градусқа дейін ыстық болады деп болжанып отыр.
Өңірлер бойынша күндізгі температура:
- батыста: +15…+20°C
- солтүстік-батыста: +17…+25°C
- солтүстікте: +21…+26°C
- орталықта: +21…+30°C
- шығыста: +19…+27°C
- оңтүстікте: +25…+34°C
- оңтүстік-шығыста: +22…+27°C
Синоптиктер ауа райының күрт өзгеруіне байланысты тұрғындарға сақ болуды ескертеді.
