Бүгін Украина президенті Владимир Зеленский мен АҚШ президенті Дональд Трамп Римде қысқа кездесу өткізді, деп хабарлайды Malim.kz.
Украина президентінің баспасөз хатшысы Сергей Никифоровтың айтуынша, бұл кездесу папа Францисктің жерлеу рәсіміне қатысар алдында ұйымдастырылды. Кездесу шамамен 15 минутқа созылған.
Кездесудің басқа мәліметтері жария етілген жоқ.
Өз кезегінде Ақ үй бұл қысқа әңгімені "өте нәтижелі" деп атап, алдағы уақытта қосымша ақпарат беретінін мәлімдеді. Бұл Трамп пен Зеленскийдің ақпан айының соңындағы Ақ үйдегі дауылдан кейінгі алғашқы кездесуі болды.
БАҚ деректеріне сүйенсек, тараптар жерлеу рәсімінен кейін тағы бір толыққанды кездесу өткізуге уағдаласқан.
Өз Telegram-каналында Владимир Зеленский кездесуді:
«Жақсы әрі символикалық кездесу болды. Бірнеше маңызды мәселелерді жеке талқылауға үлгердік. Барлық айтылған бастамалардың нәтижесіне үміт артамыз. Бастысы – халқымыздың өмірін қорғау, атысты толық әрі сөзсіз тоқтату және соғыстың қайталануынан сақтандыратын сенімді әрі ұзақ мерзімді бейбітшілік орнату», – деп жазды.
Ол сондай-ақ Ақ үй басшысына алғысын білдірді.
Еске салсақ, наурыз айында Владимир Зеленский мен Дональд Трамптың Ақ үйдегі кездесуі дау-дамайға ұласып кеткен еді.
Фото: Ukrainian Presidential Press Service/Handout via REUTERS
