Литвадағы оқу-жаттығу кезінде танкіде болған төрт америкалық сарбаз жоғалып, кейін өлі табылды, деп хабарлайды Malim.kz литвалық Delfi сайтына сілтеме жасап.
Литвалық басылымның мәліметінше, сейсенбі кешінде Пабраде полигонында жоғалған төрт шетелдік әскери қаза тауып, олардың шынжыр табанды көлігі батпақтан табылған.
Ресми дереккөздер сарбаздардың жоғалғанын растады.
Литва әскери күштерінің хабарлауынша, Пабраде полигонындағы жаттығу кезінде төрт америкалық сарбаз бен бір шынжыр табанды техника жоғалып, ауқымды іздестіру операциясы басталған.
“Операцияға литвалық және шетелдік әскери қызметкерлер, сондай-ақ Литва Әуе күштері мен Мемлекеттік шекараны қорғау қызметінің тікұшақтары жұмылдырылды”, – деп хабарлайды Delfi.
Бұған дейін Литва Қарулы Күштері оқиға орны анықталғанын және іздестіру-құтқару операциясы жалғасып жатқанын мәлімдеген. Оған Өрт және құтқару департаменті мен басқа да мекемелердің күштері тартылған.
Ақпарат көздеріне сүйенсек, сарбаздар су қоймасына кіргеннен кейін қаза тапқан болуы мүмкін. Алайда АҚШ Қарулы Күштерінің Еуропа және Африка бойынша өкілі олардың денелерінің табылғанын растамаған.
Бейресми мәліметтерге қарағанда, жоғалған сарбаздар АҚШ Қарулы Күштерінде қолданылатын ең ірі броньды көліктердің бірі – М88 жөндеу-эвакуациялық машинасында болған.
АҚШ әскери басшылығының мәлімдеуінше, жоғалған сарбаздар оқиға кезінде “жоспарлы тактикалық жаттығуларға” қатысқан.
Балтық елдері – Литва, Латвия және Эстония – НАТО мүшелері болып табылады, сондықтан бұл аймақта жиі бірлескен оқу-жаттығулар өтеді.
Фото:depositphotos.com
