Сыбайлас жемқорлық және адам құқықтарын бұзды деген айыппен 16 жыл түрмеде отырған Перудің бұрынғы президенті Альберто Фухимори 86 жасында ел астанасы Лимада қайтыс болды, деп хабарлады оның отбасы. Бұл туралы ВВС жазды.
«Қатерлі ісікпен ұзақ күрескеннен кейін әкеміз Альберто Фухимори жаңа ғана Жаратқанына оралды», - деп мәлімдеді оның балалары.
Жазда Кейко Фухимори әкесінің 2026 жылғы сайлауда мемлекет басшысы лауазымына тағы да бәсекеге түсуге ниетті екенін хабарлаған.
Перуді 1990-2000 жылдары басқарған Фухимори билік кезінде жасаған қылмысы үшін 25 жылдық жаза мерзімінің үштен екісін өтеп, өткен жылғы желтоқсанда рақымшылықпен түрмеден босатылған еді.
Оған көтерілісшілермен күресу үшін «өлім эскадрондарын» құрды және 1991-1992 жылдары 25 адамды өлтіруге қатысты, сондай-ақ мемлекет қаржысын жымқырды және басқа да сыбайлас жемқорлық қылмыстар жасады деген айып тағылды.
2000 жылы жапон текті Фухимори елден шығып, Жапонияға кетті.
Экс-президентке қатысты тергеуді бастаған Перу билігі оны экстрадициялауды сұрады, бірақ Жапония одан бас тартты.
2005 жылы Фухимори күтпеген жерден Чилиге келді, онда ол Перу ордері бойынша тұтқындалып, Лимаға жеткізілді. Ол өз еліне экстрадицияланған демократиялық жолмен сайланған алғашқы көшбасшы болды.
2007 жылы ол 25 жылға сотталды. Перу президенті Педро Пабло Кучински 2017 жылы Фухиморидің денсаулығына байланысты оған рақымшылық жасаған болатын.
Содан кейін Альберто Фухимори аурухана төсегінен жазылған мәлімдемеде ел азаматтарынан кешірім сұрап, президентке кешірім жасағаны үшін алғыс айтты, бірақ оны босатуға қатысты құқықтық дауларға байланысты алты жылдан кейін ғана босатылды.
Фото: Reuters/Pixstream
Байланысты жаналықтар
MalimBlocks
