Қазақстандық кәсіпкер әрі білім саласының өкілі Нұрасыл Медеу спорт, технология және халықаралық тәжірибені біріктіретін жаңа білім беру моделін дамытуға күш салып жүр. Оның кәсіби жолы компьютерлік ғылымдар мен жасанды интеллекттен басталып, кейін спорттық білім беру мен халықаралық киберспорт индустриясына ұласқан, деп хабарлайды Malim.kz.
EU Reporter басылымының жазуынша, Нұрасыл Медеу KNUS университетінің негізін қалаушы. Сондай-ақ 2025 жылдың соңынан бері International Esports Federation ұйымында даму жөніндегі директор қызметін атқарады.
АҚШ-тағы білім Қазақстандағы жобаларға қалай әсер етті?
Нұрасыл Медеу Boston University-де Computer Science мамандығы бойынша бакалавр дәрежесін алған. Оның оқу бағдарламасында жасанды интеллект, деректер ғылымы, киберқауіпсіздік және бағдарламалық инженерия бағыттары қамтылған.
Сұхбат барысында ол АҚШ-тағы университеттік ортаның өзіне қатты әсер еткенін айтты. Оның пікірінше, заманауи университет тек диплом беретін орын емес, білімді технология, бизнес және нақты индустриямен байланыстыратын орта болуы керек.
«Boston University маған қазіргі заманғы университеттің диплом алатын орыннан әлдеқайда кең ұғым екенін көрсетті. Білім беру студенттерді технологиямен, бизнеспен және индустриямен байланыстыра алатынын көрдім», – деді ол.
Нұрасыл Медеудің айтуынша, оның кәсіби жолы бастапқыдан екі бағытта қатар жүрген: ол Бостонда компьютерлік ғылымдарды оқып жүріп, Қазақстанда өзінің білім беру жобасын дамытқан.
Оның негізгі мақсаты – халықаралық деңгейдегі білімді Қазақстан жастарына елден шықпай-ақ қолжетімді ету.
«Шетелде оқу өте үлкен тәжірибе болуы мүмкін, бірақ ол барлығына бірдей қолжетімді емес. Мен талантты жастардың заманауи білімге, жаңа технологияларға, халықаралық сарапшыларға және кәсіби байланыстарға Қазақстаннан шықпай-ақ қол жеткізгенін қаладым», – деді Нұрасыл Медеу.
KNUS қандай модельге сүйенеді?
Нұрасыл Медеудің айтуынша, KNUS моделі спорт индустриясының болашағы тек спортшылармен шектелмейді деген ұстанымға негізделген.
Ол үшін ғылым, технология, білім, менеджмент және спорт индустриясын тұтас түсінетін мамандар қажет.
Университетті дамыту барысында Loughborough University және German Sport University Cologne секілді халықаралық оқу орындарының тәжірибесі зерттелген.
Алайда Нұрасыл Медеу олардың моделін тікелей көшіру мақсаты болмағанын атап өтті.
«Біздің мақсатымыз дайын модельді қайталау емес. KNUS Қазақстан мен Орталық Азияның қажеттіліктеріне бейімделіп құрылды. Біз халықаралық стандарттарға сай болып қана қоймай, өңірге қажет таланттарды, зерттеу әлеуетін, технология мен басқару тәжірибесін дамытуға ұмтыламыз», – деді ол.
Университет ғимараты кімге тиесілі?
Нұрасыл Медеу сұхбат барысында университет кампусына қатысты ақпаратқа да түсініктеме берген.
Оның айтуынша, KNUS – жеке университет, алайда кампус университеттің немесе оның құрылтайшыларының меншігі емес.
«KNUS – мен 2021 жылы құрған жеке университет. Бірақ кампус KNUS-қа да, оның құрылтайшыларына да тиесілі емес. Ғимарат мемлекет меншігінде және университет оны келісім негізінде білім беру мақсатында пайдаланады», – деді ол.
Оның сөзінше, келісім шарттары нысанды жекешелендіруге, сатуға немесе жеке меншікке беруге жол бермейді.
Нұрасыл Медеу бұл мәселенің қоғамға объективті жеткізілуі маңызды екенін айтты.
260 студенттен 5 мыңнан астам білім алушыға дейін
EU Reporter материалында 2022 жылы APEMS жобасында 260 бакалавр студенті болғаны айтылады.
Бес жылдан кейін университеттегі студенттер саны 5 мыңнан асқан. Биыл алғашқы түлектер де диплом алған.
Нұрасыл Медеудің сөзінше, бұл өсім тек студенттер санына байланысты емес.
Осы кезеңде академиялық команда қалыптастыруға, жаңа білім беру бағдарламаларын әзірлеуге, заманауи зертханалар ашуға, халықаралық ұйымдар және университеттермен әріптестік орнатуға басымдық берілген.
APEMS-тен KNUS-қа ауысу да жай ғана атау өзгерту емес, оқу орнының масштабы мен бағытының өзгеруін білдіреді.
Ауыл жастарына арналған Life Chance және Merit бағдарламалары
KNUS-та талантты жастарға арналған Life Chance және Merit стипендиялық бағдарламалары жұмыс істейді.
Нұрасыл Медеудің айтуынша, бұл жобалардың мақсаты – қаржылық жағдайы жастардың сапалы білім алуына кедергі болмауы.
Әсіресе ауылдық және шалғай өңірлерден шыққан, сондай-ақ әлеуметтік тұрғыдан осал отбасылардағы талапкерлерге мүмкіндік беру көзделген.
Life Chance бағдарламасы оқу ақысын толық жабады, студенттерге кампуста тегін тұру мүмкіндігін береді және ай сайынғы стипендия қарастырады.
Нұрасыл Медеудің айтуынша, шәкіртақы университеттің барлық салықтар мен міндетті төлемдер өтелгеннен кейінгі пайдасы есебінен қаржыландырылады. Ай сайынғы стипендияны университет құрылтайшысы өзі қаржыландыратынын да атап өткен.
Ал Merit академиялық бағдарламасы жоғары оқу нәтижесін көрсеткен, қабылдау емтихандарынан үздік нәтиже алған және университет өміріне белсенді араласатын студенттерге беріледі.
Нұрасыл Медеу білім беру кәсіпкерлігін ұзақ мерзімді миссия ретінде қарастыратынын айтты. Оның мақсаты – Қазақстанда халықаралық стандарттарға сүйенетін, технологияны, ғылымды, спортты және заманауи басқаруды ұштастыратын білім беру жүйесін қалыптастыру.
