Тбилисиде наразылық тоқтамады. Жұрт алаңда баррикада қойып алған

30 қараша күні таңертең Тбилисиде наразылық білдірушілер Шота Руставели даңғылында қалды. Deutsche Welle жазуынша, олар баррикадаларды нығайтып, от жағып, «Сакартвело!» деп ұрандаған, деп хабарлайды Malim.kz.

Кеше кешке ондаған мың адам қатысқан наразылық акциялары күшейіп, парламент ғимаратының алдында қақтығыстар болды. Демонстранттар полицияға петардалар мен бояу құтыларын лақтырып, парламенттің қақпаларына зақым келтірді.

Полиция су атқыштар мен газ қолданды, жарақат алғандар мен ұсталғандар бар. Президент Саломе Зурабишвили наразылықты «қарсылық қозғалысы» деп атап, еуропалық бағытты қайтару мен жаңа сайлау өткізуді қолдайтынын мәлімдеді.

Civil Georgia сайтының жазуынша, оның алдында 29 қараша күні Еуропа Кеңесінің парламенттік ассамблеясының тұрақты комитеті мәлімдеме жасап, Грузия үкіметінің ЕО-ға кіру жөніндегі келіссөздерді тоқтату туралы мәлімдемесіне алаңдаушылық білдірді. Сондай-ақ, осы шешімге қарсы наразылық білдірген азаматтарды күшпен тарату әрекеті қатаң сынға алынып, Грузияны еуропалық құндылықтарға адал болуға шақырды.

Фото: Гурам Мурадов / Civil.ge