Алматы қаласында 12-15 мамыр күндері аралығында жоспарлы электр қуатын өшіру жұмыстары жүргізіледі. Бұл туралы «Алатау жарық компаниясы» (АЖК) хабарлады, деп хабарлайды Malim.kz.
Компания мәліметінше, жарықтың уақытша сөндірілуі электр желілерін жөндеу және ақауларды жою жұмыстарына байланысты. Атап айтқанда, кабель желілері, трансформаторлық қосалқы станциялар және басқа да электр желісі нысандары жөнделмек.
Электр қуатын өшіру жұмыстары күн сайын таңғы сағат 08:00-де, кейбір аумақтарда 09:00-де басталып, кешкі 17:00-ге дейін жалғасады. Әр күн сайын қаланың әртүрлі аудандары жарықсыз қалады.
Жоспарланған өшірулер тізіміне Алматының орталық және шеткі аудандары, сондай-ақ Сәтбаев көшесі мен Райымбек даңғылы секілді ірі көшелер де енгізілген.
АЖК өкілдері ауа райына немесе күтпеген техникалық жұмыстарға байланысты жөндеу кестесіне өзгеріс енгізілуі мүмкін екенін ескертті.
Айта кетейік, бұған дейін де 4-8 мамыр аралығында Алматыда жоспарлы электр қуатын өшіру жұмыстары жүргізілген болатын. Сонымен қатар, Энергетика министрлігі сәуір айында болашақта «ақылды» есептегіштердің көмегімен тұрғындарға электр көрсеткіштерін қолмен тапсырудың қажеті болмайтынын мәлімдеген еді.
