Қазақстанның Сыртқы істер министрлігі АҚШ-та із-түзсіз жоғалған Қазақстан азаматы Әсет Құралбайға қатысты жағдайды бақылауда ұстап отырғанын мәлімдеді, деп хабарлайды Malim.kz.
Ведомствоның хабарлауынша, қазақстандық дипломаттарға Чикаго қаласында жоғалған азамат туралы ақпарат белгілі.
Қазіргі уақытта Қазақстанның АҚШ-тағы дипломатиялық өкілдері америкалық құзырлы органдармен байланыс орнатып, оқиғаның барлық мән-жайын анықтап жатыр.
«Жағдай Қазақстан Республикасы Сыртқы істер министрлігінің бақылауында», – деп хабарлады ведомстводан.
Сондай-ақ Нью-Йорктегі Қазақстанның Бас консулдығы жоғалған азаматтың туыстарымен тұрақты байланыста екені айтылды.
Бұған дейін АҚШ-та екі аптадан бері іздестіріліп жатқан Қазақстан азаматы туралы ақпарат әлеуметтік желілерде тараған болатын. Мәліметке сәйкес, 24 жастағы Әсет Құралбай Иллинойс штатындағы Форд-Хайтс ауданында тұрған.
Ол соңғы рет 2026 жылғы 2 маусымда жақындарымен байланысқа шыққан. Ал 7 маусымнан бері оның телефоны сөндірулі күйде. Жас жігіттің жеке құжаттары мен банк карталары үйінде қалған.
10 маусым күні полиция Әсет Құралбайдың көлігін тапқан. Қазіргі уақытта оны іздестіру жұмыстары жалғасып жатыр.
