Астананы аяз буып, боран соғып тұр. Ауа райының нашарлауына байланысты бірінші ауысымның 0-9 сынып оқушылары үшін сабақтар қашықтан оқыту форматына көшеді. Бұл туралы Астана қалалық Білім басқармасы хабарлады.
Астана қаласының білім басқармасы хабарлайды: 22.01.2025 жылы ауа райының нашарлауына байланысты қала мектептерінде бірінші ауысымның 0-9 сынып оқушылары үшін сабақтар қашықтан оқыту форматына көшеді, деп хабарлады Білім басқармасы.
Солтүстік Қазақстан облысында да қатты аязға байланысты 0-4 сынып оқушылары мектепке бармайды.
Солтүстік Қазақстан облысының төтенше жағдайлар департаменті ескерту жариялады. Қазір өңірде ауа температурасы -25 градус, алайда желдің әсерінен -35 градус сияқты сезіледі.
Естеріңізге сала кетейік, бұған дейін антициклон әсерінен аталған өңірде осы үш күн бойы қатты аяз тұратындығын жазған болатынбыз. Синоптиктердің болжамынша, күндіз -30 градусқа дейін жетеді деп болжанып отыр.
Сондай-ақ боранға байланысты Қазақстанның 11 облысында жолдар жабылды. Полиция күшейтілген тәртіпте жұмыс істеп жатыр.
Фото: Gov.kz
