Әзербайжанның Мемлекеттік қауіпсіздік қызметі ел аумағында Иранның Ислам революциясы сақшылар корпусы (КСИР) дайындады делінген бірнеше теракттің жолын кесті, деп хабарлайды Malim.kz. DW-ге сілтеме жасап.
Мәліметке сәйкес, күдіктілер Баку–Тбилиси–Джейхан мұнай құбырына, Бакудегі Израиль елшілігіне, Ашкенази синагогасына және тау еврейлері діни қауымдастығы жетекшілерінің біріне шабуыл жасауды жоспарлаған.
Арнайы қызметтер ел аумағына әкелінген үш жарылғыш құрылғыны залалсыздандырған. Сондай-ақ Бакудің Сабаиль ауданындағы Шых кенті маңынан бетон нысандарын жаруға арналған 7,7 кг С-4 жарылғыш заты табылған.
