«Қазақ тазысына» арнайы патент берілді

Qazpatent ұлттық зияткерлік меншік институты Қазақ тазысының патентін алды, деп хабарлайды Malim.kz.

Институт мәлімдеуінше, «Қансонар» қоғамдық бірлестігі 2013 жылы ресми тіркелген. Ұйым қазақ тазысы мен төбетті сақтап, көбейту және қоғам назарын осы тұқымдарға аудару міндетін атқарып келеді. 

Қазақ тазысы жергілікті еліміздің климатына бейімделген.

«Қансонар» мен генетика институты бірлесіп 2021-2023 жылдары ғылыми зерттеу жүргізді. Зерттеу нысаны қазақ тазысы болған. Қазақ тазысының генетикалық қорын бағалау және генетикалық профильдерін жасау мақсатында қауымдастық биоинформация мен гендік ерекшелігін екшеп, тазы тұқымының гендік параметрлерін анықтап, олардың жеке ДНҚ-профильдерін әзірледі.

Жалпы, селекциялық жетістікке патент беру жаңалық, айырмашылық, біртектілік және тұрақтылық критерийлеріне негізделеді. Патент арқылы берілетін құқықтық қорғау тұқымның сипаттамасында көрсетілген белгілер жиынтығымен анықталады.

Зерттеулер қазақ тазысының жоғары жүйке жүйесінің типологиялық ерекшеліктерін, жүйке жүйесінің функционалды жағдайының тұрақтылығын зерттеді. Тазы тұқымының жүгіру кезіндегі ұшқырлығы мен тұрақтылығы жоғары жүйке жүйесінің функционалды жағдайымен байланысты екені байқалды. Қазақ тазысының жоғары жүйке жүйесінің ерекше тұрақтылығы оны басқа тұқымдардан айрықшалайды.

Жыл сайын «Қансонар» қауымдастығының барлық аймағындағы өкілдіктерінде қазақ тазысы тұқымының аймақтық, республикалық көрмелері өткізіледі. Бұл көрмелерде иттерді бағалау және стандартқа сәйкестігі туралы сарапшы қорытындылары беріледі.

«Қазақ тазысы» тұқымы жел мен нөсерге, аяз және ыстыққа төзімді.

Айта кету керек, 2023 жылдың 2 қаңтарында президент Қасым-Жомарт Тоқаев қазақ тазысы мен төбетті мемлекет қорғауына алу туралы заңға қол қойған болатын.

Фото: Qazpatent