Қазақстан атом электр станциясын (АЭС) салу үшін технологияларды жеткізушілермен жүргізген бәсекелестік диалогын аяқтады, деп хабарлайды Malim.kz.
Энергетика министрлігі мәлімдеуінше, АЭС құрылысына қажетті технологияларды жеткізетін әлеуетті жеткізушілердің қысқа тізімін жариялаған. Оған «Росатом» мемлекеттік корпорациясы, кореялық KHNP компаниясы, қытайлық CNNC және француздық EDF компаниясы енген.
Алайда, министрлік жеткізушіні немесе консорциумды таңдау жөнінде шешім әлі қабылданбағанын атап өтті.
Қорытынды шешім 2025 жылы Қазақстанның ұлттық мүдделерін, халықаралық нормаларды және міндеттемелерді ескере отырып қабылданады, деп жазылған министрлік хабарламасында.
Сонымен қатар, 21 қаңтарда Қазақстан делегациясы, энергетика министрі Алмасадам Сәтқалиевтің жетекшілігімен Ресейге жұмыс сапарымен барған. Бұл сапар бәсекелестік тендерге қатысушылардың ұсыныстарын бағалау бойынша келіссөздер сериясының соңғы кезеңі болды. Бұған дейін 2024 жылдың қазан айы мен желтоқсан айы аралығында Қазақстан делегациясы Корея Республикасына, Францияға және Қытайға жұмыс сапарларын ұйымдастырған еді.
Фото: Malim.kz
