Депутаттар бір ауыздан қолдады – Қазақстан тағы да қарыз алмақ

Қазақстан Халықаралық қайта құру және даму банкінен 346 миллион еуроға жуық қарыз алмақ. Бұл туралы бүгін қаржы министрі Ерұлан Жамаубаев мәжілісте айтты.

«Қазақстан керекті қаржының 75%-ын ішкі нарықтан тартты. Бірақ, ішкі нарық терең емес, ондағы ақша асса екі-үш жылға ғана беріледі. Яғни, белгілі бір қиындық пайда болады – екі-үш жылдан кейін біз өте үлкен көлемде қарызды өтеуге мәжбүр боламыз. Сондықтан біз әр тараптандыруға тырысамыз, мына біз алып отырған қарыз әжептәуір ұзақ, 10-11 жылға арналған», - деді қаржы министрі мәжілістің пленарлық отырысында.    

345,7 млн еуро қарыз туралы ақпарат тамыз айында шыққан. Ол туралы алдымен Бүкіләлемдік банктің баспасөз қызметі хабарлады. Жамаубаев бұл қарыздың пайыздық мөлшерлемесі өзгелерден гөрі әлдеқайда аз деп те мақтанды. Оның айтуынша, қазір «қарыз бойынша халықаралық пайыздық мөлшерлеме 10 жылға 5-5,5%, ал, бұл қарыздың пайыздық мөлшерлемесі 2,5%-дан аспайды» екен.

Парламент Мәжілісінің Қаржы және бюджет комитетінің төрағасы Марат Құсайыновтың айтуынша, бұл туралы екі жақты келісім 24 тамызда бекітіліп, заң жобасы 16 қыркүйек күні Мәжіліске түскен. Екі жарым жылдық жеңілдік кезеңі бар бұл қарызды алуға президенттің шілдедегі бұйрығы арқылы қол жеткізген Қаржы министрлігі оны 11,5 жылдан кейін жауып бітеді. Аталмыш қаржы Жамаубаев ведомствосына бір реттік траншпен түседі.

«Алып отырған қарызды реттеу және қайтару Қаржы министрлі арқылы қаржылық талаптар мен бекітілген келісімдер негізінде әр жылғы республикалық бюджет есебінен қарастырылады. Барлық Парламент Мәжілісінің барлық комиеттері бұл заң жобасына келісім берді. Оны қарау кезінде депутаттар тарапынан ешқандай ұсыныс түскен жоқ», - делінген комитет төрағасы таратқан мәлімдемеде.