Каспий құбыр консорциумы Теңіз терминалында мұнай жеткізуді тоқтатты. Теңіз терминалының жұмысы жағымсыз иіске қатысты тұрғындар шағымына байланысты тоқтатылған. Бұл туралы компанияның баспасөз қызметі мәлім етті.
Белгілі болғандай, 10 сәуірден бастап Новороссийскінің бірқатар БАҚ-ында мұнай өнімдерінің жағымсыз иісі және ықтимал экологиялық проблемалар туралы хабарламалар жарияланған. Кәсіпорын тұрғындардың әлеуметтік желідегі арыз-шағымдарын да ескеріп, осыған байланысты мұнай жеткізуді жоспарлы түрде тоқтатқан.
«10 сәуірден бастап қазіргі уақытқа дейін КҚК теңіз терминалы ТЛУ арқылы мұнай жеткізудің жоспарлы тоқтатылуына байланысты резервуар паркіне мұнай қабылдамайды. Тиісінше, КҚК қондырғылары жағымсыз иіс тудыратын органикалық қосылыстар көзі болған емес», - делінген КҚК хабарламасында.
Айта кетерлігі, Каспий құбыр консорциумы (КҚК) Қазақстаннан мұнай экспортының негізгі және ең тиімді бағыты болып қалып отыр. Консорциум ұзындығы 1511 км Теңіз-Новороссийск мұнай құбырын пайдаланады, бұл – қазақстандық мұнай көлемінің 80%-дан астамын экспорттайтын негізгі бағыт.
Еске сала кетейік, 19 ақпанда да КҚК қазақстандық мұнай жөнелтуді тоқтатқан еді. Ол кезде ауа райының қолайсыздығы себеп болған. Кейін консорциум Теңіз кенішінен мұнай қабылдауды тоқтатты. Бірнеше күннен кейін Қазақстан мұнайын жөнелту қайта жалғасқан еді.
