Ауылды жердегі қызметкерлер тұрғын үй саламын десе, мемлекет құрылысқа кететін шығынның 50 пайызын төлеп бермек. Субцидия арқылы. Бүгін Орталық коммуникациялар қызметінде брифинг берген Индустрия және инфрақұрылымдық даму бірінші вице-министрі Қайырбек Өскенбаев осындай жаңалығымен бөлісті.
Жалпы, вице-министрдлің айтуынша, пандемияға қарамастан өткен жылмен салыстырғанда биыл тұрғын үй құрылысына салынған инвестиция 33,8 пайызға өскен. Яғни, құрылыс алаңында дағдарыс жоқ. Керісінше серпіліс бар. Бұл серпіліске зейнетақы қорындағы қаржыға тұрғын үй алу мүмкіндігін беру себеп болғар. «Отбасы» банкінің құрылымдарын жаңартып, жаңа бағыт ұстануы да әсер еткен. Және тұрғын үй құрылыс саласына мемлекеттік қолдаудың молынан келуі де оң ықпалын тигізген.
Мәселен, бірінші вице-министрдің айтуынша, тұрғын үй құрылысын ынталандыру және құнын арзандату мақсатында мемлекет тұрғын үй құрылысы салынатын аудандарды, оның ішінде азаматтарға жеке құрылыс салу үшін бөлінетін жер учаскелерін инженерлік желілермен жабдықтай бастаған. Алдағы бес жылда 235 мың жер учаскесіне қажетті инфрақұрылым жүргізілмек екен. Бұл жер телімдерінің 125 мыңы облыс орталықтарында, шағын қалаларда болса, 110 мыңы ауылдық жерлерде болмақ. Осыншама жерге инфрақұрылым жүргізіп біту үшін жыл сайын республикалық бюджеттен 130 млрд теңге бөлінбек. Инфрақұрылымы жүріп дайын тұрған облыс немесе шағын қалаларда тұрғын үй салып алу оңай делік. Ал ауылды жерде жағдайы жасалатын 110 мың учаскіге үйді кім салмақ?
Индустрия және инфрақұрылымдық даму бірінші вице-министрі Қайырбек Өскенбаевтың айтуынша, бұл мәселенің шешу жолын президенттің тапсырмасына сәйкес реттеп қойыпты.
«Мемлекет басшысының тапсырмасына сәйкес ауылдағы қызметкерлер үшін тұрғын үй салу кезінде жұмыс беруші шығындарының 50 пайызын субсидиялауды көздейді. Ауылдағы жұмыс берушілер қандай мамандар керек екенін анықтап, оларға өз тарапынан үй салуға ниет білдіріп, жергілікті әкімдікке тізімді ұсынуларына болады. Өз кезегінде әкімдік оны министрлікке жолдайды. Ведомство жобаларды тексеріп, рұқсатын береді. Жұмыс беруші ауылдағы азаматтар үй салғаннан кейін біз оның 50 пайызын мемлекет тарапынан субсидиялап қайтарамыз», - деді Қ.Өскенбаев.
