Иран президенті Масуд Пезешкиан ирандық ядролық бағдарлама бойынша АҚШ-пен келіссөздерді бастауды тапсырды. Бұл туралы Иран үкіметіндегі дереккөзге сілтеме жасаған Fars агенттігі мәлімдеді, деп хабарлайды Malim.kz.
Дереккөздің мәліметінше, Иран мен АҚШ арасындағы келіссөздер тек ядролық бағдарламаға қатысты болады.
Tasnim агенттігі де дереккөзге сілтеме жасап, Тегеран мен Вашингтон келіссөздерді алдағы күндері бастауы мүмкін екенін хабарлады.
Келіссөз жүргізушілер ретінде Иранның сыртқы істер министрі Аббас Аракчи мен АҚШ президентінің арнайы өкілі Стив Уиткофф қатысуы ықтимал. Келіссөздердің нақты орны мен уақыты әлі анықталған жоқ.
Axios порталы дереккөздеріне сүйене отырып, Түркия, Мысыр және Қатар Уиткофф пен Иранның жоғары лауазымды өкілдері арасындағы кездесуді келесі аптада Анкарада ұйымдастыру бағытында жұмыс жүргізіп жатқанын мәлімдеді.
Басылымның жазуынша, АҚШ президенті Дональд Трамптың әкімшілігі бірнеше арна арқылы Иранға келіссөздерге дайын екені жөнінде хабар жеткізген.
Иранның Ұлттық қауіпсіздік жоғарғы кеңесі хатшысының халықаралық мәселелер жөніндегі орынбасары Али Багеридің айтуынша, Тегеран мен Вашингтон арасындағы келіссөздер Иранның байытылған ядролық материалдарын, әсіресе уранды, үшінші елдерге беру мәселесін қамтымайды.
«Иранның ресми тұлғаларында байытылған ядролық материалдарды қандай да бір үшінші елдерге беру үшін негіз жоқ, әрі келіссөздер бұл мәселеге мүлде қатысты емес», – деді Багери. Оның сөзін Tasnim агенттігі келтіреді.
28 қаңтарда Трамп АҚШ армадаларының Иран жағалауларына жақындағанын айтып, Тегеранды ядролық келісім жасау үшін дереу келіссөз үстеліне отыруға шақырды. Ол талап орындалмаған жағдайда ауқымды соққы жасалуы мүмкін екенін ескертті.
Сондай-ақ Трамп өз командасына Таяу Шығыста ұзаққа созылатын соғыс қаупін тудырмайтын, Иранға қарсы жылдам әрі шешуші соққылардың нұсқаларын дайындауды тапсырғаны белгілі болды.
Иранның жоғарғы көшбасшысы Әли Хаменеи АҚШ Иранға шабуыл жасайтын болса, әскери қақтығыс бүкіл аймаққа таралатынын ескертіп мәлімдеме жасады.
