Израильдің Қорғаныс армиясы (ЦАХАЛ) Газа секторының оңтүстігіндегі ХАМАС тобы пайдаланатын инфрақұрылым нысандарына әуе соққыларын жасады, деп хабарлайды Malim.kz ВВС-ке сілтеме жасап.
Израиль тарапының мәлімдеуінше, соққылардың себебі – Рафах қаласы маңында ХАМАС содырларының израильдік әскерге оқ атуы.
Премьер-министр Биньямин Нетаньяху да мәлімдеме жасап, егер атысты тоқтату режимі тағы да бұзылатын болса, Ислам қозғалысына қарсы қатаң жауап шаралары қолданылатынын ескертті.
Бұған дейін хабарланғандай, ХАМАС мүшелері қару қолдану және танкіге қарсы зымыран ату арқылы Рафах маңында орналасқан Израиль армиясының бөлімшелеріне шабуыл жасаған. Бұған жауап ретінде израильдік артиллерия содырлардың позицияларына қарсы соққы берді.
Бұл оқиға Газа секторындағы осал бейбіт келісімге тағы да қауіп төндіріп отыр.
Фото: Getty Images
