Израиль әскері Ливанның оңтүстігіндегі Набатия провинциясына әуе шабуылын жасады, деп хабарлайды Malim.kz DW-ге сілтеме жасап.
Израиль қорғаныс армиясының (ЦАХАЛ) мәліметінше, соққының нысанасы израильдік әскери қызметкерлерге қауіп төндірді делінген күдікті содырлар болған. Қазіргі уақытта операцияның нәтижелері зерделеніп жатыр.
Айта кетейік, бұған дейін бір күн бұрын АҚШ-тың арағайындығымен Израиль мен Ливан оңтүстік Ливанға қатысты шеңберлік келісімге қол қойған еді. Құжатқа сәйкес, ЦАХАЛ күштерінің бір бөлігі Литани өзенінің солтүстігі мен оңтүстігіндегі екі ауданнан шығарылады. Бұл аумақтарды Ливан армиясы АҚШ әскери қызметкерлерінің қатысуымен бақылауға алады.
Израиль мен Ливан арасында бүгінге дейін ресми дипломатиялық қатынас орнатылмаған және екі ел 1948 жылдан бері формалды түрде соғыс жағдайында саналады.
