Солтүстік Корея көшбасшысы Ким Чен Ын шетелдегі әскери операцияларда қаза тапқан әскери қызметшілердің отбасыларына арналған Пхеньян қаласындағы жаңа тұрғын аудан құрылысының аяқталу рәсімін басқарды, деп хабарлайды Malim.kz ЦТАК-қа сілтеме жасап.
ЦТАК мәліметінше, Сэбер көшесі салынды. Ол «ел халқының шетелдік әскери операцияларға қатысқан, Ұлы Отанның мәңгілік абыройы мен гүлденуі үшін еш күмәнсіз жалғыз өмірін қиған батыр жауынгерлердің жұлдыздай жарқыраған ерлігін мәңгі ұрпақтан-ұрпаққа жеткізуге деген ұмтылысын бейнелейтін монументалды сәулет нысандарының бірегей кешені» ретінде сипатталған.
Сөз сөйлеу барысында КХДР басшысы жаңа аудан қаза тапқан әскери қызметшілердің «рухы мен құрбандығын» бейнелейтінін айтты. Оның сөзінше, бұл үйлер қара жамылған отбасыларға «ұлдары мен жұбайларын мақтан тұтып, бақытты өмір сүруге» мүмкіндік беруі тиіс.
Сондай-ақ ол жобаны «тіпті бір күн бұрын аяқтауға» тырысқанын, бұл қаза тапқандардың отбасыларына «аз да болса жұбаныш әкеледі» деген үмітте болғанын жеткізді.
ЦТАК жариялаған фотосуреттерде Ким Чен Ын қызының ертуімен қаза болған сарбаздардың туыстарын жұбатып, жаңадан салынған үйлерін аралап жүргені көрсетілген.
Іс-шара туралы орыс тіліндегі хабарламада ЦТАК бірде-бір рет Ресей туралы айтпаған.
Өзара қорғаныс туралы келісім аясында Солтүстік Корея Ресейге шамамен 14 мың әскери қызметшіні Украинаға қарсы ұрыс қимылдарына қатысу үшін жіберген. Оңтүстіккореялық, украиналық және батыс дереккөздерінің мәліметінше, олардың 6 мыңнан астамы қаза тапқан болуы мүмкін, деп жазады Reuters.
