Жастар есірткі таратудың және жарнамалаудың құқықтық салдары туралы білсе де, олардың кейбірі есірткінің заңсыз айналымынан бас тартар емес. Сондықтан нашақорлыққа қарсы иммунитет қалыптастыруда отбасының айрықша рөлін ескере отырып, ІІМ ата-аналарға жазғы демалыс қарсаңында балалар өміріне барынша көңіл қою керектігін ескертеді, деп хабарлайды Malim.kz.
Ішкі істер министрлігінің ресми өкілі Шыңғыс Әлекешевтің айтуынша, өз балаларыңыздың араласатын ортасын білу, олар пайдаланатын интернет-ресурстарды бақылау аса маңызды. Заттарының ішінен медициналық препараттардың қорабын, фольга немесе шыны түтікшелер байқалса, елеусіз қалдырмау керек. Мұның бәрі синтетикалық есірткі тұтынуға арналған болуы әбден мүмкін.
Сонымен қатар, оның айтуынша, сабақтағы үлгерімінің нашарлауы, сабаққа бармауы және араласатын ортасының өзгеруі ата-ана назарынан тыс қалмауы керек. Агрессия, аяқ астынан көңіл күйінің өзгеруі, шаршаңқы күйге жиі түсуі де есірткі тұтынып жүргенінің белгілері болуы ықтимал. Баланың бойынан үш немесе одан да көп осындай белгілер байқалса, тез арада шара қолдану қажет.
Ақша жұмсауы жиілесе немесе қаражаты көп болса, бұл да алаңдауға тұрарлық мәселе. Өйткені баланы есірткі тұтынуға ғана емес, оны таратуға да тартуы мүмкін. Егер баланың телефоны мен мессенджерлерінен геолокация көрсетілген суреттер, үй қабырғалары мен бағандардағы штамптарды байқасаңыз, бұл да күмән тудыратын жайт. Себебі онда есірткі жасырылған жерлер көрсетілуі мүмкін, дейді Шыңғыс Әлекешев.
Одан бөлек, министрлік өкілі нөмірлер мен түрлі сайттардың сілтемесі жазылған тізімге, изолентаға оралған заттарға да назар салу керек екенін айтады.
Жалпы, есірткі қылмыстары үшін жауапкершілік 16 жастан басталады.
Фото: gov.kz
Байланысты жаналықтар
MalimBlocks
