Көшпенділер ойынынан кейін қазақ халқын балағаттаған Қырғызстан азаматы ұсталды
Ол көпшіліктен кешірім сұрады
Астанада өткен V Дүниежүзілік Көшпенділер ойындары аясында өткен көкпар додасынан соң финалды әділетсіз өтті деп санап, әлеуметтік желіде Қазақстан көкпаршыларымен бірге қазақ халқын балағаттаған қырғызстандық жанкүйер ұсталды. 1bol сайты оны Қырғызстан қауіпсіздік қызметі ұстап, көпшілік алдында кешірім сұратқанын жазды, деп хабарлайды Malim.kz.
Ұсталған азамат әлеуметтік желіде Қазақстанның туын лақтырып, мемлекеттік рәмізді қорлаған. Бұл өз кезегінде мыңдаған адамның ашуын тудырды.
Екі елдің арасына от салып, арандатқан жас жігіттің ұсталғанын Қырғызстан Ұлттық қауіпсіздік мемлекеттік комитеті мәлімдеген. 21 жастағы азамат видеокамера алдында екі елден де кешірім сұрап, өз қателігін мойындады.
Айта кететін жайт, қазақ пен қырғыз көкпаршыларының финалдық ойынында қосымша уақытта Қазақстан құрамасы 5:4 есебімен жеңіске жетті. Осыдан кейін қарсылас команда наразылық білдіріп, марапаттау рәсімінде Қазақстанның әнұранын тыңдамай кетіп қалды. Артынша олар қазақ көкпаршыларын қарымта матч өткізуге шақырғанымен, біздің елдің көкпаршылары бұл ұсыныстан бас тартты.
Фото: бейнежазбадан скриншот/kaktus.media
