Әлеуметтік желілерде 1985 жылы туған азаматшаның дәрі-дәрмек қолдану арқылы суицид жасамақ болған әрекетінің бейнежазбасы тараған. ATYRAU ONLINE телеграм-арнасы бұл жағдайға байланысты Атырау облыстық полиция департаменті қолға алғанын жазды, деп хабарлайды Malim.kz.
Жергілікті полицияның мәлімдеуінше, қазір оқиғаның барлық мән-жайын анықтау үшін кешенді тексеру шаралары жүргізіліп жатыр.
Қалалық білім бөлімінің өкілдері де жағдайға түсініктеме берген. Олардың айтуынша, оқиға С. Зиманов атындағы №37 орта мектепте болған. Бұған дейін мектеп ұжымы директордың оқу ісі бойынша екі орынбасарын жұмыстан шығаруға қарсы болған.
Қалалық білім бөлімінің басшысы Айнагүл Дюсекенова мұғалімдермен жиналыс өткізіп, заңсыз жұмыстан шығаруға жол берілмеуін қатаң ескерткен. Мектеп басшылығына ұжымдағы жағдайды тұрақтандыру және мұғалімдердің жұмыс орнын сақтау туралы хаттамалық тапсырма жіберілген.
Осы жанжалдың барысында кезекті педагогикалық кеңес кезінде ағылшын тілі пәнінің мұғалімі мектеп басшылығы тарапынан қысымға ұшыраған. Бұл оқиғаға себеп болуы мүмкін.
Осы жағдайға байланысты білім бөлімі арнайы комиссия құрған. Барлық мән-жай зерттеліп, заңбұзушылықтар анықталса, тиісті шаралар қабылданбақ.
Фото: pixabay.com
