Шетелдіктердің заңсыз көші-қонын ұйымдастырған үш топ ұсталды
Барлық дерек бойынша 20-дан астам адам қылмыстық жауапкершілікке тартылып жатыр
Ішкі істер министрлігі елге түрлі қылмыстық және террористік элементтердің енуіне жол бермеу мақсатында заңсыз көші-қон арналарының жолын кесу үшін бірнеше қылмыстық топты ұстады, деп хабарлайды Malim.kz.
Министрлік мәліметінше, Түркістан және Жамбыл облыстарында қолдан құжаттар жасау және оларды бұрмалау арқылы шетелдік азаматтардың заңсыз көші-қонын ұйымдастыруға қатысы бар үш қылмыстық топтың жолы кесілген.
Батыс және Солтүстік Қазақстан облыстарында шетелдіктерді іргелес мемлекеттің аумағына шекараның қиылысқан жерлері арқылы заңсыз тасымалдауға ниет білдірген қазақстандықтарға қатысты қылмыстық істер тергеліп жатыр.
Қызылордада ҰҚК шекара қызметімен бірлесіп, шетелдіктердің Қазақстан аумағында заңсыз болуы үшін жалған анықтамалар дайындау бойынша «делдалдық» қызметтер көрсетумен айналысқан адамдар тобы ұсталған.
Барлық көрсетілген дерек бойынша 20-дан астам адам қылмыстық жауапкершілікке тартылып жатыр. Олардың мүлкі тәркіленіп, 7 жылға дейінгі мерзімге бас бостандығынан айыру түріндегі жазаға тартылуы мүмкін, деді ІІМ ұйымдасқан қылмысқа қарсы күрес департаментінің өкілі Қуандық Алпыс.
Фото: видеодан скриншот
