Нью-Йорктің жаңадан сайланған мэрі, 34 жастағы саясаткер Зохран Мамдани өзінің жеңіс сөзінде «Америкада саяси түнек орнаған сәтте Нью-Йорк – жарықтың нұрына айналады» деп мәлімдеді, деп хабарлайды Malim.kz.
Бруклиндегі қолдаушыларының алдында сөйлеген Мамдани АҚШ президентіне тікелей үн қатып:
«Егер елге Трампты қалай жеңу керегін көрсете алатын бір қала болса, ол – оны дүниеге әкелген қала», – деді.
Саясаткердің айтуынша:
«Егер деспоттың жүрегіне қорқыныш ұялатудың жолы бар болса, ол – оның билікті өз қолына шоғырландыруына мүмкіндік берген жағдайларды жою. Біз осылайша Трампты ғана емес, оның ізбасарын да тоқтатамыз. Сондықтан, Дональд Трамп, сен бұл сөзді тыңдап отырғаныңды білемін. Дыбысты күшейт – менің саған жолдауым бар», – деді Мамдани.
Ол сондай-ақ:
«Біз өзіміз сүйетіндердің мүддесін қорғауымыз керек деп сенеміз – мейлі ол иммигрант болсын, трансгендер қауымының өкілі, Дональд Трамп қызметінен босатқан қара нәсілді әйелдердің бірі болсын, немесе азық-түлік бағасының төмендеуін күтіп жүрген жалғызбасты ана болсын. Нью-Йорк енді исламофобия арқылы саяси ұпай жинайтын қала болмайды», – деп атап өтті.
Мамдани айқын жеңіске жетіп, 50,4% дауыс жинап үлгерді. Ал Дональд Трамптың қолдауына ие болған тәуелсіз кандидат Эндрю Куомо – 41,6% дауыс жинады.
Зохран Мамдани Нью-Йорк тарихындағы алғашқы мұсылман мэр болмақ. Ол демократиялық социализм идеясын ұстанады және сайлауалды бағдарламасында тұрғын үй жалдау бағасының өсуін шектеу, қоғамдық автобустарды тегін ету, сондай-ақ балалар күтімі қызметтерін қолжетімді ету уәдесін берген.
