«Бортсерікті ұрып, «бомба» деп айғайлаған». Астана әуежайында тентек жолаушы ұсталды
Оған екі бірдей баппен қылмыстық іс қозғалған
Астана қаласы әуежайындағы желілік полиция бөлімінің қызметкерлері «Астана-Өскемен» бағытындағы әуе рейсінің 47 жастағы жолаушысын ұстады, деп хабарлайды Malim.kz.
ІІМ Көліктегі полиция департаментінің мәліметінше, оның әрекеттері қоғамдық қауіпсіздікке қатер төндірген.
Мас күйінде болған құқықбұзушы бортсеріктің ішінен бір рет ұрып, әуе кемесінен шығып бара жатып «бомба» деп айқайлап, жолаушылар мен экипаж арасында дүрбелең тудырды. Бұзақылық және терроризм актісі туралы көрінеу жалған хабарлау деректері бойынша екі бірдей қылмыстық іс қозғалды, деп жазылған полиция мәлімдемесінде.
Әуе кемесіне дереу мұқият тексеру жүргізілген, оның барысында жарылғыш құрылғылар мен басқа да тыйым салынған заттар табылмаған.
Полиция хабарламасына қарағанда, мұндай мінез-құлыққа жол берілмейді және қатаң түрде жолы кесіледі. Көліктегі жағдайды тұрақсыздандыру немесе қорқыту әрекеттері үлкен қауіп ретінде қарастырылып, кінәлілер заңмен қатаң жазаланады.
Күдікті уақытша ұстау изоляторына қамалған.
Фото: facebook/FlyArystan
