Петропавлдағы мектепте үстеріне төбе сылағы түскен үш бала ауруханадан ертең шығарылмақ.
Бұл туралы көпбейінді облыстық балалар ауруханасының директоры Александр Гассман айтты. Қазірде балалардың жағдайы жаман емес.
- 4 желтоқсан күні сағат 18.28 минут кеткенде 12-13 жастағы үш бала жеткізілді. Олардың үстіне мектепте төбенің сылағы құлап кеткен екен. Бүгін травматолог пен облыстың штаттан тыс невропатологы қарап, тексерді. Бұған дейін қойылған «бас миы шайқалу» диагнозы расталмады. Екі баланың арқасы жарақаттанған. Үшінші бала басынан соққы алған, - дейді Александр Гассман.
Еске салайық, 4 желтоқсан күні Петропавл қаласындағы №6 Қожаберген жырау атындағы мектепте төбе сылағы опырылып түскен. Құлаған сылақтың аумағы екі шаршы метр. Оқиға сабақ кезінде болған. Соның салдарынан үш оқушы зардап шеккен.
900 оқушыға арналған мектеп 2020 жылы пайдалануға берілген.
Фото: Әлеуметтік желіден
MalimBlocks
