Қайғылы оқиға жексенбіден дүйсенбіге қараған түні Қарқаралы маңында болған. Марқұм еңбек демалысында болған, деп хабарлайды Malim.kz.
Қарағанды қалалық полиция басқармасы бастығының орынбасары, полиция полковнигі Бекжан Құсайынов 53 жасында кенеттен өмірден озды деген суыт хабарды қайғыра жеткіземіз. Ол 30 жылдан астам өмірін Отанға қызмет етуге, қоғамдық қауіпсіздікті қамтамасыз етуге және құқықтық тәртіпті қорғауға арнады. Қызмет жолын 1992 жылы Қарағанды облысы Қарқаралы аудандық ішкі істер бөлімінің патрульдік-бекеттік қызметі милиционері лауазымынан бастаған. Әр жылдары түрлі жауапты қызметтерді атқарып, Қарағанды қалалық полиция басқармасы бастығының орынбасары лауазымына дейін көтерілді. Ол әрдайым кәсіби біліктілігімен, өзіне және әріптестеріне талапшылдығымен, принципшілдігімен, адалдығы және адамдарға деген құрметімен ерекшеленді, – деп мәлімдеді Қарағанды облыстық полиция департаментінің баспасөз қызметі.
Қарағанды облыстық полиция департаментінің басшылығы, ішкі істер органдары ардагерлер кеңесі және бүкіл жеке құрам марқұмның отбасы мен жақындарына шын жүректен көңіл айтты.
Фото: Қарағанды облыстық полиция департаменті
