Шерзат Болаттың отбасын жаңа адвокаттар қорғайды
Қаржаубай отбасы Айтбек Нүкеновпен байланысты тоқтатуды қалаған
Блогер әрі қоғам белсендісі Жан Ахмадиев Талғар ісіне қатысты сотқа қатысатын жаңа қорғаушыларды таныстырды, деп хабарлайды Malim.kz.
Ахмадиевтің айтуынша, отбасы адвокаттардан толық бас тартпаған, тек Айтбек Нүкеновпен байланысты тоқтатуды қалаған.
Қаржаубайдың отбасы адвокаттардан бас тартты деген қате түсінік қалыптасып жатыр. Шын мәнінде, олар тек Айтбек Нүкеновпен – Салтанат Нүкенованың ағасымен арадағы байланысты үзуді жөн көрді. Шерзаттың ісін енді еліміздің беделді заңгерлері – Мейірман Шекеев пен Жандос Балманов қолға алады. Нақты айтқанда, бұл істі Шекеевтің компаниясы жүргізеді, – деді Ахмадиев.
Өз кезегінде Мейірман Шекеев Қаржаубай отбасы өз компаниясының адвокаттарына сенімхат бергенін және алдағы уақытта Шерзаттың ісін жүргізетін қорғаушылар тобын жасақтайтынын мәлімдеді. Сондай-ақ бұл іске ерікті түрде қосылғысы келетін адвокаттарды қабылдауға дайын екенін жеткізді.
Қазіргі таңда Қаржаубай мен Гүлбара ханым біздің компаниямызға сенімхат рәсімдеді. Енді біз арнайы топ құрып, сотта олардың мүддесін қорғайтын боламыз. Сонымен қатар көмектескісі келетін адвокаттар болса, біздің қатарымызға қосыла алады. Бұрынғы қорғаушыларға ешқандай шектеу қойылмайды, егер олар қосымша жұмыс істеуге ниетті болса, бірге жұмыс істеуге дайынбыз, – деді Шекеев.
Ол, сондай-ақ, бұрынғы қорғаушылардан іс материалдарын сұратқанын, алайда екі күннен бері олар құжаттарды әлі тапсырмағанын атап өтті.
Фото: видеодан кадр
